Eerste braif aan Korintiërs Kelekte en raaisveurnemens (16: 1- 9)

Eerste braif aan Korintiërs 16

⁰¹Wat kelekte veur God zien volk aanbelangt: volg regels dij ik veur gemaintes in Galatië vaststeld heb.
⁰²Elke eerste dag van week mout ie thoes wat achteroet leggen en opspoaren, elks noardat e t braid het. Aans zol t oplopen nog begunnen mouten as ik al bie joe kommen bin.
⁰³As ik den bie joe aankommen bin, zel ik manlu dij ie der kepoabel tou achten, mit n braif noar Jeruzalem tou sturen om joen goave òf te droagen.
⁰⁴En liekt joe t beter tou dat ik ook mit goa, den kinnen zai mit mie mit raaizen.

⁰⁵Ik kom bie joe as ik Macedonië deurraaisd heb. Macedonië dou k ja allain op deurraais aan,
⁰⁶mor bie joe zel ik, as t immer kin, laanger blieven. Meschain winter wel over. Den kin ie mie wieder aan raais helpen, woar of ik den ook mor hèn goa.
⁰⁷Ik bin dit keer noamelk nait van plan joe allain mor eefkes op deurraais te bezuiken, mor k hoop wat laanger bie joe te blieven as de Heer t goudvindt.
⁰⁸Mor aan Pinkster tou blief ik nog in Efeze.
⁰⁹Deur staait hier ja wiedwoagen veur mie open. Waark is ter zat. En der binnen n bult dij ons integen kommen.