Twijde braif aan Timoteüs Wedevraauwen in hoesholden en in gemainte (5: 3-16)

Twijde braif aan Timoteüs 05

⁰¹Ik besweer die ten overstoan van God en van Christus Jezus, dij over leventegen en doden vonnis wiezen zel wanneer dat e as keunenk verschient:
⁰²zeg bosschop rond, spreek mensken der op aan, of heur t gelegen komt of nait, roup heur tou verantwoorden, bestraf heur, spreek heur moud in. Doar hest aal dien geduld en bekwoamhaid om te onderwiezen bie neudeg.
⁰³Der zel ja n tied kommen dat ze gezonde leer nait laanger oetstoan kinnen. Den zellen ze zok n haile bult leroars aanhoalen, elks noar zien aigen smoak, zo tezzel binnen ze op wat of ze heuren.
⁰⁴Onder t geheur van woarhaid zellen ze vandoan goan en t zuiken bie opbedochte verhoalen.
⁰⁵Mor wees doe in ale omstandegheden nöchtern, verduur t lieden, dou wat of n evengelist te doun het, moak dien toak doan.

⁰⁶Wat mie aanbelangt: t levent lopt al oet mie vot as n wienovver, en t ogenblik dat ik opbreken mout is stoef bie.
⁰⁷Goie stried heb k oetvochten, mien boan heb k aan t èn tou oetlopen, t geleuf heb k vastholden.
⁰⁸Nou ligt ter nog n kraans veur mie kloar, dij mie van rechten toukomt. Dij zel de Heer mie as rechtveerdeg rechter op dij dag geven. En mie nait allenneg, mor aal dijent dij zien stroalend veurkommen laifhad hebben.

⁰⁹Dou dien best gaauw bie mie te kommen.
¹⁰ Demas het mie ja zitten loaten, omreden hai het zien haart aan dizze wereld geven. Zo is hai noar Tessalonica goan, Crescens noar Galatië, Titus noar Dalmatië.