2 Samuël Doaved wordt aal staarker; Abner kust zien kaant (3: 1-21)

2 Samuël 03

⁰¹Toch was t aalgedureg weer oorlog tussen t hoes van Saul en t hoes van David. Mor David wer aal staarker en staarker, en t hoes van Saul aalweg swakker.
⁰²In Hebron kreeg David dizze zeuns: oldste was Amnon, zien moeke was Achinoäm van Jizreël;
⁰³twijde: Kileab, zeun van Abigaïl, dij eerder traauwd west haar mit Nabal van Karmel; daarde: Absalom, zeun van Maächa, n dochter van Talmai, keunenk van Gesur;
⁰⁴vaaierde: Adonia, zien moeke was Chaggit; viefde: Sefatja, zien moeke was Abital;
⁰⁵zèsde: Jitream, zeun van David zien vraauw Egla. Aal dizze zeuns binnen geboren in Hebron.

⁰⁶In tied dat t hoes van Saul en t hoes van David mit nkander in oorlog wazzen, kreeg Abner t aal meer veur t zeggen in t hoes van Saul.
⁰⁷Saul haar n bievraauw had, Rispa, n dochter van Ajja. Abner legde t aan mit heur. Dou vruig Isboset hom: “Hou konstoe dat doun mit dij bievraauw van mien voader?”
⁰⁸Abner wer hoagels om dat gezegde van Isboset. “Bin ik sums n minne hond, dij t mit Juda holdt?” zee e. “Nou heb ik mie hailtied oetsloofd veur t hoes van joen voader Saul, zien bruiers en zien kammeroaden. Ik heb joe nooit in handen speuld van David. En nou verwitst doe mie n oaventuurke mit n vraauw!
⁰⁹God mag mie k wait nait wat doun, as ik nait zörg dat David krigt wat de HEER hom mit n aid touzegd het:
¹⁰ dat t keunenkschop ofnomen wordt van t hoes van Saul en dat David op troon komt van hail Israël en Juda, van Dan òf tot Berseba tou.”
¹¹ Isboset haar t haart nait n woord weerom te zeggen, zo baang was e veur Abner.

¹² Votdoalek stuurde Abner bodes noar David mit bosschop: “Aan aans gainent as joe komt t laand tou.f + Der staait aiglieks: “Veur wèl is t laand?” Wie denken dat Abner bedoult: Veur gain aander as veur joe. Aandern zeggen: hai bedoult: veur gain aander as veur mie; ik kin der mit doun wat ik wil, en ik wil t aan joe geven.f* Moak mor n akkoord mit mie, den help ik joe en moak ik dat hail Israël aan joen kaant staait.”
¹³ “Akkoord!” zee David. “Mor op ain veurwoarde, huifst mie nait onder ogen kommen astoe Michal, Saul zien dochter, nait bie die hest.”
¹⁴ Ook stuurde David bodes noar Isboset, Saul zien zeun, mit bosschop: “Geef mie Michal weerom, mien vraauw dij ik kregen heb veur n bruudschat van honderd veurhoeden van Filistijnen.”
¹⁵ Isboset luit heur vothoalen bie heur man vandoan; dij haitte Paltiël, zeun van Laïs.
¹⁶ Paltiël ging mit op pad, aalweg rerend laip hai achter heur aan, haildaal aan Bachurim tou. Eerst dou Abner zee: “Vot, noar hoes!” ging e weerom.

¹⁷ Abner haar overleg mit oldsten van Israël. Hai zee: “Al n hail zet leden wol ie David as keunenk.
¹⁸ Pak den nou tou! De HEER het ja zegd: 'Deur mien knecht David zel ik mien volk Israël verlözzen van Filistijnen en van aal zien aander vijanden.'”
¹⁹ Ook haar Abner overleg apaart mit d'oldsten van Benjamin. Dou ging e noar Hebron om David zulm te vertellen wat Isrelieten en haile stam Benjamin onnaaierd haren.
²⁰ Dou Abner in gezelschop van twinneg man bie David in Hebron kommen was, richtte David n feestmoal veur heur aan.
²¹ Abner zee tegen David: “Mien heer en keunenk, ik goa vot hèn en veraineg hail Israël veur joe. Den sloeten ze n overainkomst mit joe en ie worden keunenk over t haile laand en t haile volk. Dat is ja krekt wat ie geern willen.” Dou luit David Abner in ale rust en vree votgoan.