Numeri 34
01De HEER zee tegen Mozes:
02“Geef Isrelieten dizze aanwies: 'As ie in Kanaän kommen, is dit t laand dat ie in bezit kriegen, t laand Kanaän mit zien grènzen:
03Zuudgrèns lopt van woestijn Sin bie Edom langs en begunt bie t zuudoostelk oetèn van Zoltzee.
04Doar bogt grèns oetzied om zuudkaant van Schorpioenpas tou en lopt deur noar Sin en komt zuud van Kades-Barnea oet en lopt verder via Chasar-Adar noar Asmon.
05Bie Asmon bogt grèns noar Beek van Egypte en lopt verder noar zee tou.
06Westgrèns is Grode Zee. Dat is joen westelke grèns.
07En dit is noordgrèns: Van Grode Zee òf mout je n lien trekken noar baarg Hor.
08Van baarg Hor òf mout je n lien trekken noar Lebo-Hamat, dij oetkomt bie Sedad.
09Den gaait grèns noar Zifron en komt e oet bie Chasar-Enan. Dit is noordelke grèns.
10 As grèns in t oosten mout je boaken zetten van Chasar-Enan noar Sefam.
11 Van Sefam lopt grèns omdeel noar Haribla, oost van Aïn, vervolgens lopt e verder omdeel bie baarghelgen langs aan oostkaant van t Kinneretmeer.
12 Den gaait grèns wieder bie Jordaan langs noar Zoltzee. Dit binnen grènzen van t laand dat veur joe is.'”
13 Mozes gaf Isrelieten dizze aanwies: “Dat is t laand dat ie nkander deur t löt touwiezen mouten en dat ie noar t bevel van de HEER aan negenenhaalve stam geven worden mouten.
14 Want femilies van stam van Rubenieten en femilies van stam van Gadieten en haalve stam Manasse hebben heur aarfdail al kregen.
15 Twijenhaalve stam hebben heur aarfdail al kregen aan aanderkaant Jordaan bie Jericho, in t oosten op, woar zun opkomt.”
16 De HEER zee tegen Mozes:
17 “Dit binnen noamen van manlu dij joe t laand touwiezen mouten: priester Eleazar en Jozua, zeun van Nun.
18 Doarbie mout ie van elke stam ain laaider nemen om t laand as aarfdail tou te wiezen.
19 Dit binnen noamen van manlu: veur stam Juda Kaleb, zeun van Jefunne;
20 veur stam Simeon Semuël, zeun van Ammihud;
21 veur stam Benjamin Elidad, zeun van Kislon;
22 veur stam Dan femilie-oldste Bukki, zeun van Jogli;
23 wat noazoaten van Jozef aangaait: veur stam Manasse femilie-oldste Channiël, zeun van Efod;
24 en veur stam Efraïm femilie-oldste Kemuël, zeun van Siftan;
25 veur stam Zebulon femilie-oldste Elisafan, zeun van Parnach;
26 veur stam Issachar femilie-oldste Paltiël, zeun van Azzan;
27 veur stam Aser femilie-oldste Achihud, zeun van Selomi;
28 veur stam Naftali femilie-oldste Pedaël, zeun van Ammihud.”
29 Dit binnen degenen dij de HEER opdracht gaf om aan Isrelieten n aarfdail tou te wiezen in t laand Kanaän.
