2 Makkabeeërs Jason verdringt Onias van zien stee (4:7-22)

2 Makkabeeërs 04

⁰⁷Dou keunenk Seleukes noa zien dood opvolgd wer deur Antiochus, ook bekend as Epifanes, wos Onias zien bruier Jason t hogepriesterschop te kriegen deur boudel om te kopen.
⁰⁸In n onderhold mit keunenk beloofde hai hom drijhonderdsesteg zulvern talenten en doar bovenop nog ais tachteg, dij e woaraarns aans vothoalen zol.
⁰⁹Boetendes zee e tou dat e honderdfiefteg talent doun zol as keunenk hom machtegde om n gimmestiekschoul te stichten en n oplaaidensinstituut veur jongkerels. Hai beloofde ook dat lu van Jeruzalem van nou òf aan Antiochenen nuimd worden zollen.
¹⁰ Keunenk ging der mit akkoord en Jason kreeg macht in handen. Votdoalek begunde hai zien volksgenoten Griekse menaaier van levent op te leggen.
¹¹ Hai schafte veurrechten òf dij keunenk aan Jeuden verlaind haar op aanstoan van Johannes, dij zien zeun loater as ofgezant mit Romaainen akkoordjen zol over n vrundschopsverdrag. Hai verkloarde de olde Jeudse veurschriften veur ongeldeg en voerde gebruken in dij doar in stried mit wazzen.
¹² Mit opzet luit e zien gimmestiekschoul stoef aan onderkaant van tempelbaarg zetten en hai preste de beste jongkerels n Griekse efebenhoud op te doun.
¹³ Onder invloud van schoamachtege Jason, dij t hogepriesterschop haildaal nait weerd was, nammen vergrieksen en overnoame van boetenlaandse gewoontes zo aldernoarst tou,
¹⁴ dat priesters heur altoardainsten nait meer noakwammen. Tempel verwoarloosden ze en ovvern deden ze nait meer aan. Veul laiver gingen ze zo gaauw as ze konden, votdoalek as ze oproup van gong heurden, noar worstelschoul om mit te helpen bie t gimmestieken. En dat was dwaars tegen Jeudse veurschriften in.
¹⁵ Griekse eretaikens haren ze meer in reken as eervolle plichten van heur veurolders.
¹⁶ Dat zodounde belandden ze in n stoere pezietsie, want dijent van wèl ze perbaaierden heur menaaier van leven noa te doun en doar haildaal op te lieken, dat wazzen nou juust heur vijanden en onderdrokkers.
¹⁷ Zo as blieken zel oet wat er nog komt, is t n minne zoak veur mensken as ze goddelke veurschriften verpoazen.

¹⁸ n Moal dou in Tyrus, doar keunenk bie was, vaaierjoarliekse wedstrieden holden werden,
¹⁹ stuurde dij smerege Jason n ofvoardegen van zogenoamde Antiochenen oet Jeruzalem. Dij ofgezanten haren drijhonderd zulvern drachmes mitkregen veur n ovver aan Herakles, mor omdat ze vonden dat dat gain pas gaf, wollen ze t bedrag laiver aan aans wat besteden.
²⁰ Zo wer t geld dat ofzender veur n ovver aan Herakles onnaaierd haar, deur lu dij t mitnomen haren, bruukt veur t oetrusten van oorlogsschepen.

²¹ n Aander moal vernam Antiochus van Apollonius, zeun van Menesteus, dij noamens keunenk inhuldegen van keunenk Filometor van Egypte biewoond haar, dat Filometor hom vijandeg gezind was. Antiochus muik zok zörgen om vaaileghaid van zien riek en raaisde via Joppe noar Jeruzalem tou.
²² Jason en inwoners van stad huilen keunenk mit veul stoatsie in en keunenk dee zien intocht mit n feestelke fakkeloptocht.