Eerste braif aan Korintiërs Perfeet is van meer belang as wèl in extase proat (14: 1-25)

Eerste braif aan Korintiërs 14

⁰¹Goa achter laifde heer! En zai den mor dat ie gaistelke goaven kriegen. Benoam t vermogen te profetaaiern.
⁰²Wèl in klanktoal proat, het t ja nait tegen mensken, mor tegen God. Der is ja gain mensk dij der n oor veur het: t is gehaaimtoal wat of de Gaist hom proaten let.
⁰³Mor wèl profetaaiert, het t tegen mensken. Zien woorden baauwen joe op; geven joe moud en troost.
⁰⁴Wèl in klanktoal proat, dut zokzulm deugd. Wèl profetaaiert , dut gemainte deugd.
⁰⁵Om mien paart mag ie best altmoal in klanktoal proaten. Mor k heb laiver dat ie profetaaiern. Profeet is van meer belang as wèl in klanktoal proat. Of t mos wezen dat e t ook oetlegt. Den kin gemainte der teminnent beter van worden.

⁰⁶Neem nou t gevaal: ik proat tegen joe in klanktoal. Wat heb ie doar aan as k joe gain openboaren of inzicht of profetische bosschop of wieze les mitdou?
⁰⁷Ook as t om dooie instermenten gaait, floit of citer, den nóg geldt: der mout verschil wezen in geluden dij ze geven. Hou zol ie aans herkennen wat of ter floten of tokkeld wordt?
⁰⁸Net zo toch ook mit n trompet: as dij n sienjoal geft dat nait bekend is, wèl komt ter den op t appèl?
⁰⁹Zo is t ook mit joe: as ie in dij toal van joe n verhoal doun doar men gain taauw aan vaastknuppen kin, hou zel ain den begriepen wat of ie zeggen? Den is joen proaten zo te reken n slag in lucht.
¹⁰ Der binnen in wereld wèl-wait-houveul soorten van geluden en der is zuver niks of t moakt geluud.
¹¹ As ik nou nait wait wat n bepoalde klank bedudt, kin ik mit man dij proat gain kontakt kriegen en hai nait mit mie.
¹² Krekt zo is t ook mit joe. Nou ie verbraand binnen op gaisten, mout joe t ter om te doun wezen joe ekstroa in te zetten veur opbaauw van gemainte.

¹³ Wèl in klanktoal proat, mout doarom God vroagen dat e dat ook oetleggen kin.
¹⁴ As ik ja in klanktoal aanbeden dou, beedt mien gaist wel aan, mor mien verstand dut ter zien paart nait tou.
¹⁵ Hou mout we der den mit aan? Ik wil aanbeden mit mien gaist, mor ook mit mien verstand. Ik wil zingen mit mien gaist, mor ook mit mien verstand.
¹⁶ As ie ja enkeld mit joen gaist God lof brengen, hou zel den ain dij in baank van belangstellenden zit, amen zeggen op joen daankgebed? Hai wait ja nait wat of ie zeggen!
¹⁷ Ie moaken t wel mooi in joen daankgebed, mor n aander het ter niks aan.
¹⁸ Goddaank heb ik meer as ie altmoal de goave in klanktoal te proaten.
¹⁹ Mor in n kerkdainst spreek ik laiver vief woorden mit mien verstand om ook aandern wat bie te brengen as k-wait-nait-houveul in klanktoal.

²⁰ Bruiers en zusters, gedroag joe in t bruken van joen verstand nait as lutje kinder. Nee, as t om slechteghaid gaait, den mag ie best onneuzel wezen. Mor in t bruken van joen verstand mout ie joe as wazen mensken gedroagen.
²¹ In wet staait: “Deur lu mit n vremde toal en deur boetenlanders zel ik tegen dit volk proaten, mor èns den nog nait zellen ze noar mie lustern, zegt de Heer.”
²² Zo zain ie mor: vremde toalen dainen as boak nait veur geleuvegen, mor veur ongeleuvegen. Mor n bosschop van n profeet is nait veur ongeleuvegen, mor veur geleuvegen.
²³ Stel joe veur: haile gemainte komt bie nkander en altmoal begunnen ze in klanktoal te proaten. Nou kommen doar belangstellenden of ongeleuvegen tou kerk in. Zellen dij den nait zeggen: “Ie binnen van joen verstand!”?
²⁴ Mor brengen ze altmoal n profetische bosschop en der komt den n belangstellende of n ongeleuvege in, den heurt dij van altmoal wat of e verkeerd dut en mout zok veur heur verantwoorden.
²⁵ Wat zien haart bezied huil, komt zo veur t licht. Den zel e zok veurover valen loaten en God aanbeden, en t oetbezunen: “Zekerwoar! God is middenmaank joe!”