2 Makkabeeërs Zuvern van tempel (10:1-8)

2 Makkabeeërs 10

⁰¹Judas Makkabeüs en zien manlu nammen, laaid deur de Heer, tempel en stad weer in bezit.
⁰²Altoars dij deur vremde volken op maart hènzet wazzen, smeten ze ondersteboven, en haailegdommen dij doar baauwd wazzen ook.
⁰³Noadat ze tempel zuverd haren, muiken ze n nij altoar. Ze sluigen nij vuur en brochten veur t eerst in twij joar weer ovvers. Ze braandden ook wierook, ze zörgden veur lampen en legden weer teunbroden hèn.
⁰⁴Dou ze dit aalmoal doan haren, bogen ze zok daip veurover en smeekten de Heer dat e heur nooit meer mit zokse rampen overvalen wol, mor heur, as ze ooit weer zundegen zollen, heur genoadeg stravven wol en heur nait meer oetlevern aan haaidense barboaren.
⁰⁵Op aigenste dag van zulfde moand dat dij deur vremde volken ontwijd was, op 25 kislew, haar t zuvern van tempel ploats.
⁰⁶Blied as ze wazzen, vierden ze aacht doag laank feest, krekt as dat bie t Loofhuttenfeest gebruuk is, en ze dochten der aan hou of ze nog mor eefkes leden t Loofhuttenfeest vierd haren mouten in holen in rotsen, as daaiern in t wild.
⁰⁷Mit versierde stòkken, gruine twiegen en paalmtoeken in haand, zongen ze loflaiden op hom dij heur in stoat steld haar zien hoes te zuvern.
⁰⁸Mit aalgemaine stemmen wer besloten dat t Jeudse volk van nou òf aan elk joar dizze doagen vieren zol.