Wieshaid van Jezus Sirach Heer let Israël nait in steek (17:17-24)

Wieshaid van Jezus Sirach 17

⁰¹De Heer het mensken schoapen oet eer,
en let hom doar noar weerom kommen.

⁰²Hai dee mensken n ofpaasd aantal doagen,
mor ook macht over aal wat ter op eerde is.

⁰³Hai het hom oetrust mit zien aigen kracht,
en hom moakt noar zien aigen beeld.

⁰⁴Aal wat leeft het e veur mensk ontzag geven,
dat zai heersen zollen over daaiern en vogels.

⁰⁵De Heer dee hom vief zintugen,
as zèsde zintuug kreeg hai van hom verstand,

as zeuvende t woord, doar de Heer zien doaden mit bekendmoakt worden.

⁰⁶Benul, n tong, ogen, oren en n haart,
gaf hai heur om begrip te kriegen.

⁰⁷Roem en rij paartte hai hom kennes en inzicht tou,
en huil hom veur wat goud en kwoad is.

⁰⁸In zien haart het hai ontzag veur hom geven,
dat mensk zien grode doaden zain kon,

en zok deur aiwen hèn op zien wonderdoaden beroemen kon,

^9-10 dat e zien grode doaden verkundegen zol,
en zien haailege noam priezen.

¹¹ Hai dee heur kennes en wet dij leven geft,
dat ze besevven zollen dat zai dij leven, staarven mouten.

¹² n Aiweg verbond het hai mit heur sloten
en heur zien veurschriften geven.

¹³ Zai zagen zien grode macht
en heurden zien krachtege stem.

¹⁴ Hai zee tegen heur: “Neem joe in acht veur ale onrecht,”
en gaf heur regels veur omgang mit aander mensken.

¹⁵ Heur doun en loaten is hom haildaal bekend,
dat ontkomt hom nait.

¹⁶ Van jongs òf aan binnen ze op t kwoade oet,
en van heur haarten van stain kinnen ze gain haarten van vlaais moaken.

¹⁷ Dou de Heer volken over eerde verdailde,
stelde hai over elk van heur n heerser aan,

mor Israël is de Heer zien aigendom.

¹⁸ Omreden dat is zien eerstgeboren zeun,
brengt hai hom groot en geeft hom onderricht.

Hai let zien volk nait in steek,

hai geft dij t licht van zien laifde.

¹⁹ Aal heur doaden binnen veur hom zo helder as zun,
zien ogen binnen der altied op richt.

²⁰ Heur onrechtveerdeghaid ontkomt hom nait,
aal heur zunden binnen de Heer bekend.

²¹ Mor de Heer, dij goud is en wait wat e moakt het,
het handen nait van heur oftrokken,

hai het ze nait aan heur löt overloaten, mor het heur spoard.

²² Mensk zien barmhaarteghaid is veur hom as n zegelring,
goudhaid van mensk verzörgt e as zien oogappel –

hai vervult zien zeuns en dochters mit beraauw.

²³ Op t lest zel hai kommen en heur doun noar heur doaden,
heur zunden let e deelkommen op heur aigen kop.

²⁴ Mor dij beraauw het, geft hai n nije kaans,
dij moudveren hangen let, pittjet hai aan.