t Evengelie volgens Marcus Vroag noar Jezus zien gezag (11:26-33)

t Evengelie volgens Marcus 11

¹² Aanderdoags, dou ze oet Betanië kwammen, kreeg e honger.
¹³ Van vèrren zag e n viegeboom, vol in t blad. Hai ging kieken of der al wat aan zat. Niks hur, bloots blad! t Was ja ook gain viegetied.
¹⁴ Hai zee tegen boom: “Nooit meer zellen ze van die nog n vieg eten!” Zien leerlingen heurden dat.

¹⁵ Dou kwammen ze in Jeruzalem. Hai ging in tempel en begunde lu dij doar aan t kopen en aan t verkopen wazzen der oet te bìnzeln. Toaveltjes van geldwizzeloars en doevehandeloars heur stoultjes kiepte hai ondersteboven.
¹⁶ Hai wol nait lieden dat ter ain mit zien handel over t tempelplaain laip.
¹⁷ Hai leerde heur: “Staait ter nait schreven: 'Mien hoes zel n hoes wezen om te beden veur ale volken'? Mor ie hebben der ja n rovershool van moakt!”
¹⁸ Hogepriesters en schriftgeleerden heurden der van en ze perbaaierden oet te vigelaaiern hou of ze hom van kaant moaken konden. Want ze wazzen benaauwd veur hom. t Haile volk ston der ja versteld van wat of e leerde.
¹⁹ Dou t loat wer, gingen ze tou stad oet.

²⁰ Smörgensvroug dou ze bie viegeboom langs kwammen, zagen ze dat dij aan worrels tou verdreugd was.
²¹ Petrus mos denken aan wat ter gebeurd was, en zee: “Kiek es! Viegeboom dij ie vervlökt hebben: haildaal verdreugd!”
²² “Ie mouten vertraauw in God hebben,” zee Jezus.
²³ “Ik verzeker joe: wèl of tegen dij baarg doar zegt: 'Tou! Smiet die in zee!' en wèl of nait twievelt in zien haart, mor vertraauwt dat gebeuren zel wat of e zegt, dij zel t ook veurnkander kriegen.
²⁴ Doarom zeg ik joe: woar of ie ook veur beden en woar of ie ook om vroagen, vertraauw der mor op dat ie t al kregen hebben. Den krieg ie t vaast en zeker!
²⁵ As ie stoan te beden en ie hebben wat tegen ain of aander, den mout ie hom dat vergeven. Den zel joen Voader in hemel joe joen misstappen ook vergeven.”f + Aander handschriften hebben veur vers 26: “Mor as ie mensken nait vergeven, zel joen Voader in hemel joe joen misstappen ook nait vergeven.”f*

²⁷ Ze kwammen weer in Jeruzalem. In tied dat e in tempel rondkuierde, kwammen hogepriesters, schriftgeleerden en oldsten noar hom tou.
²⁸ “Mit wat veur recht doun ie dit?” vruigen ze. “En wèl het joe dat recht geven?”
²⁹ “Ik heb ook n vroag aan joe,” antwoordde hai. “As ie mie doar antwoord op geven, zel ik joe ook vertellen mit wat veur gezag ik dit dou.
³⁰ Mien vroag is: deup van Johannes, woar kwam dij heer? Van hemel of van mensken? Geef mie doar ais antwoord op!”
³¹ Ze onnaaierden onder nkander: “As wie zeggen: 'Van hemel!' den zegt hai vaast en zeker: 'Woarom heb ie hom den nait leufd?'
³² Mor mout we den zeggen: 'Menskenwaark …'?” Dat duurden ze nait woagen om t volk. Dat was ter ja vaast van overtuugd dat Johannes n echte profeet was.
³³ Ze gavven beschaaid: “Wie waiten t nait!” “Den vertel ik joe ook nait mit wat veur recht of ik dit dou!” zee Jezus.