Genesis Oabram zien stried om Lot te bevrijden (14: 1-24)

Genesis 14

⁰¹Dou Amrafel keunenk van Sinear was en Arjoch keunenk van Ellasar, Kedorlaömer keunenk van Elam en Tidal keunenk van Goïm, dou wol t gevaal
⁰²dat zai oorlog kregen mit Bera, keunenk van Sodom, en Birsa, keunenk van Gomorra, Sinab, keunenk van Adma, en Semeber, keunenk van Seboïm, en ook mit keunenk van Bela, dat nou Soär hait.
⁰³Mit mekoar kwammen zai as bondgenoten noar t daal Siddim, dat is nou Zoltzee.
⁰⁴Zai haren twaalf joar onder Kedorlaömer zeten, mor in t dattiende joar kwammen ze in opstand.
⁰⁵In t vattiende joar kwam Kedorlaömer mit keunenks dij aan zien kaant stonden en zai versluig Refaïeten in Asterot-Karnaïm, de Zuzieten in Ham, de Emieten in Sawe-Kirjataïm,
⁰⁶en dreven Chorieten oet baargen van Seïr doar zai woonden, tot aan El-Paran, dat tegen woestijn aanligt.
⁰⁷Op weeromraais kwammen ze in En-Mispat, dat nou Kades hait, en verwoestten ale laand van Amalekieten en ook van Amorieten in Chaseson-Tamar.
⁰⁸Dou trokken keunenks van Sodom oet, mit keunenks van Gomorra, Adma, Seboïm en Bela, dat nou Soär hait, en stelden zok op in slagorde in t daal van Siddim,
⁰⁹tegen Kedorlaömer, keunenk van Elam, Tidal, keunenk van Goïm, Amrafel, keunenk van Sinear, en Arjoch, keunenk van Ellasar: vaaier keunenks tegen vief.
¹⁰ In t daal van Siddim wazzen overaal asfaltputten. Dou keunenks van Sodom en van Gomorra op de loop gingen, vuilen ze doarin. De rest ontkwam noar baargen.
¹¹ Ale bezittens van Sodom en Gomorra hebben ze heur ofnomen, heur mondveurroad ook. Dou gingen ze vot.
¹² Zai nammen Lot, zeun van Abram zien bruier, mit zien bezittens ook mit. Hai woonde ja in Sodom.

¹³ Ain dij ontkommen was, kwam bie Hebreeër Abram en vertelde hom t. Hai woonde bie aikenbomen van Amoriet Mamre, dij n bruier van Eskol en Aner was, bondgenoten van Abram.
¹⁴ Dou Abram heurde dat zien neef oppakt was, raip hai de striedboare lu op dij geboren wazzen in zien hoes, drijhonderdachtien in getal, en zat achter heur heer tot aan Dan tou.
¹⁵ Zien manschoppen verdailde hai snaachts en zo versluig hai heur en hai zat achter heur heer tot Choba, aan noordkaant van Damascus.
¹⁶ Hai brochde aal heur bezittens weerom. Zien neef Lot mit zien hebben en holden, mit vraauwlu en t volk ook.

¹⁷ Dou Abram weerom was van slag tegen Kedorlaömer en dij aander keunenks, ging keunenk van Sodom hom in muit, in t daal van Sawe , dat hait ook wel Keunenksdaal.
¹⁸ Melchisedek, keunenk van Salem, brochde brood en wien. Hai was priester van God, de Alderhoogste.
¹⁹ Hai zegende hom en zee:
“Mag Abram zegend wezen

deur God de Alderhoogste,

schepper van hemel en eerde.

²⁰ Mag God, de Alderhoogste, eer bewezen worden,
dij joen vijanden in joen haand geven het.”

Abram gaf hom tienden van ales.
²¹ Keunenk van Sodom zee tegen Abram: “Geef mie mensken weerom en hol t goud veur joezulm.”
²² Mor Abram zee tegen keunenk van Sodom: “Ik sweer bie de HEER, de Alderhoogste, schepper van hemel en eerde,
²³ dat ik alderdeegs gain droad of schounraim, ja haildaal niks dat van joe is, nemen zel. Ie zellen nooit zeggen kinnen: 'Ik heb Abram riek moakt.'
²⁴ Gain sproake van! Bloots wat knechten verteerd hebben en dij manlu, dij mit west hebben. Loat Aner, Eskol en Mamre heur dail nemen.”