Ezechiël Gog zien leger versloagen (38: 1-39:29)

Ezechiël 38

⁰¹Ik kreeg dit woord van de HEER:
⁰²“Manmensk, richt die tou Gog, grootvorst van Mesech en Tubal, in t laand Magog, en profetaaier tegen hom.
⁰³Zeg: 'Dit zegt God, de HEER: Gog, grootvorst van Mesech en Tubal, ik zel die!
⁰⁴Ik kom die hoalen, ik sloag die hoaken in koaken en sleep die mit, die en dien haile leger derbie, dien peerden en peervolk, dien schitternde kriegers, dien haile troep sweerdvechters, bewoapend mit grode en lutje schilden;
⁰⁵en soldoaten oet Perzië, Nubië en Libië, mit heur schilden en helms,
⁰⁶en Gomer mit aal zien troepen, Bet-Togarma oet t hoge noorden vandoan mit aal zien troepen: n haile bult volken binnen t!
⁰⁷Beraaid die der op veur, moak die kloar, doe en dij haile mennegte dij zok bie die aansloten het: wees doe heur veurman.
⁰⁸Noa verloop van tied, in vèrre toukomst, zelstoe odders kriegen om op te trekken tegen n laand dat nog mor net biekommen is van oorlog, tegen n volk dat oet n haile bult aander volken vandoan weer bie nkander brocht is op baargen van Israël, dij zo laank n wildernis west hebben. En as ze weeromkommen binnen, woont t doar zunder zörg.
⁰⁹Mit dien troepen en aal dien bondgenoten zelstoe opzetten kommen as n dunderbui, as n wolk dij t laand onderdekt.

¹⁰ Dit zegt God, de HEER: As t zo wied is, zelstoe filaaine plannen oetbrouden.
¹¹ Denkst bie diezulm: Dat laand van steden zunder stadsmuren zel ik aanvalen. Ik zel optrekken tegen dij aargeloze mensken dij doar zo onbezörgd wonen in heur steden zunder muren, grondels of poorten.
¹² Doe gaaist ter hèn om te plundern en te roven en die te vergriepen aan puunbulten dij weer bewoond binnen, aan n volk dat oet n bult volken bie nkander kommen is, dat weer hoave en goud kregen het en nou woont in t middelpunt van wereld.
¹³ Lu oet Seba en Dedan, handeloars en kooplu oet Tarsis, zellen tegen die zeggen: 'Bistoe kommen om te plundern en te roven? Hestoe dij haile mennegte op n bainen brocht om roofgoud in wacht te slepen? Om gold en zulver mit te nemen, om hoave en goud te bemachtegen, om ales te plundern en te roven?'

¹⁴ Profetaaier doarom, manmensk, zeg tegen Gog: 'Dit zegt God, de HEER: As mien volk Israël weer onbezörgd woont, zelstoe t gewoarworden.
¹⁵ Den komstoe en aal dien bondgenoten oet joen woonstee oet t hoge noorden vandoan, aal dij kerels-op-peerd, dij haile tjucht volk, dat dikke leger.
¹⁶ As n wolk dij t laand onderdekt zelstoe tegen mien volk Israël optrekken. In t leste van doagen zel ik die noar mien laand brengen en as ik aal volken deur die, Gog, zain loat dat ik haaileg bin, zellen ze waiten wèl of ik bin.

¹⁷ Dit zegt God, de HEER: Bistoe man van wèl ik tieden heerwoarts, joarenlaank aankundegd deur Israël zien profeten, mien knechten, zegd heb dat ik hom sturen zol om Isrelieten aan te valen?

¹⁸ Dag dat Gog t laand van Israël aanvaalt – zegt God, de HEER – zel mien gram lösbarsten.
¹⁹ In mien ofgunst, in t vuur van mien grammiedeghaid, zeg ik: Dij dag zel der n swoare eerdbeven t laand van Israël trevven.
²⁰ Vizzen in zee, vogels in lucht, wilde daaiern, ales wat op grond rondkropt en aal mensken op haile wereld zellen veur mie trillen van benaauwdens. Baargen störten deel, staaile kanten van rotsen kommen noar beneden, stadsmuren valen in puun.
²¹ Op aal mien baargen zel ik oorlog oetroupen tegen Gog – zegt God, de HEER – en zien manlu zellen nkander mit heur sweerden bevechten.
²² Ik zel Gog stravven mit pest en dood, ik loat slagregens, hoagelstainen, swevel en vuur op hom deelkommen en op zien troepen en aal zien bondgenoten der bie.
²³ Ik zel mien groothaid en mien haaileghaid zain loaten en mie aan volken bekendmoaken. Ze zellen besevven dat ik de HEER bin.'”

⁰¹Manmensk, profetaaier tegen Gog en zeg: 'Dit zegt God, de HEER: Ik zél die, Gog, grootvorst van Mesech en Tubal!
⁰²Ik kom die hoalen, ik sleep die mit, ik loat die kommen oet t hoge noorden vandoan en breng die noar baargen van Israël.
⁰³Doar sloag ik die boog tou linkerhaand oet en pielen oet rechterhaand.
⁰⁴Op baargen van Israël zelstoe sneuveln, mit aal dien troepen en mit aal dien bondgenoten, en doar geef ik die as vreten aan alderhande roofvogels en aan wilde daaiern.
⁰⁵Ook in t open veld zelstoe sneuveln. Ik heb sproken – zegt God, de HEER.
⁰⁶Magog zel ik in vlammen opgoan loaten, net as lu dij aan zeekaant wonen en dij mainen dat ze vaaileg binnen. Ze zellen waiten dat ik de HEER bin.
⁰⁷Mien haailege noam zel ik aan mien volk Israël kundeg moaken. Ik zel mien haailege noam nait laanger schenden loaten. En aander volken zellen besevven dat ik de HEER bin, haaileg in Israël.

⁰⁸Joa wis, t zel gebeuren – zegt God, de HEER! Dat zel dag wezen doar ik t over had heb.
⁰⁹Isrelieten zellen den tou heur steden oetkommen om woapens te bruken as branholt. Zeuven joar laank zellen ze vuur stoken kinnen van grode en lutje schilden, bogen en pielen, van stòkken en speren.
¹⁰ Omdat ze doar vuur mit stoken kinnen, huiven ze gain takken te sprokkeln op t laand of holt te kappen in t bos. Zo plundern zai, dij heur plundern wollen en beroven zai, dij heur beroven wollen – zegt God, de HEER.

¹¹ Dij dag groaf ik in Israël n graf veur Gog, in t Verbiegoandersdaal, aan oostkaant Dode Zee. Dij verbie goan willen, zellen der den nait meer langs kinnen: Gog en zien haile leger worden doar begroaven. Doarom hait t ook: t Daal van Gog zien leger.
¹² Isrelieten zellen heur begroaven om t laand te zuvern. Doar zellen ze zeuven moand over doun.
¹³ Elkenain in Israël zel doar mit aan gaang wezen, en dat zel heur tou eer strekken op dag dat ik mien heerlekhaid zain loaten zel – zegt God, de HEER.
¹⁴ Boetendes zellen ze n koppel manlu aanstellen dij aalgedureg deur t laand goan mout en verbiegoanders begroaven dij op t laand liggen bleven binnen, om zo t laand te zuvern. Noa dij zeuven moand zellen ze op onderzuik oet goan
¹⁵ en vannijs deur t laand goan mouten. As ain van heur den bonken van mensken liggen zugt, mout hai der n maarktaiken bie zetten dat doodgroavers ze begroaven kinnen in t Daal van Gog zien leger
¹⁶ (der is doar ook n stad dij noar dat leger hait), en zo t laand zuvern.'

¹⁷ Manmensk, dit zegt God, de HEER: Zeg tegen aal vogels en tegen aal wilde daaiern: 'Kom van aal kanten bie mekoar, overaal vandoan, en kom noar t slachtfeest tou, t grode slachtfeest dat ik veur joe kloarmoak op baargen van Israël. Eet vlaais en drink bloud!
¹⁸ Eet ter vlaais van helden, drink ter bloud van vorsten van haile wereld: van rammen, lammer, bokken en bollen, aalmoal daaiern, vetmest in Basan.
¹⁹ Eet joe zat aan heur vet, drink joe doen aan heur bloud, t is t slachtfeest dat ik veur joe kloarmoakt heb.
²⁰ Bie mien toavel kin ie joe ongans eten aan peerden en ruters, aan helden en kriegslu – zegt God, de HEER.
²¹ Ik zel mien heerlekhaid onder aal volken gelden loaten. Ze zellen zain hou of ik ze straf en heur aanpak.

²² Van dij dag òf aan zel t volk van Israël besevven dat ik, de HEER, heur God bin,
²³ en aander volken zellen besevven dat t Isrelieten heur aigen schuld is dat ze in ballengschop goan binnen. Omdat ze mie ontraauw wazzen, heb ik heur rug toukeerd. Ik leverde heur oet aan heur vijanden en aalmoal kwammen ze te valen deur t sweerd.
²⁴ Ze hebben kregen wat of ze mit heur onraainhaid en heur misdoaden verdaind haren: ik heb heur rug toukeerd.
²⁵ Mor, zegt God, de HEER: Nou zel ik n keer brengen in Jakob zien löt, ik zel mie ontfaarmen over t haile volk van Israël en vechten veur mien haailege noam.
²⁶ Heur schaande en ontraauw aan mie mouten ze droagen, ook as ze weer onbezörgd op aigen grond wonen doar gainent heur opschrikken dut.
²⁷ Deur heur vot te hoalen bie vremde volken vandoan, deur heur bie nkander te brengen oet landen van heur vijanden, loat ik n bult volken zain dat ik haaileg bin.
²⁸ Ze zellen besevven dat ik, de HEER, heur God bin: ik heb heur over haile wereld in ballengschop stuurd, en ik breng heur weer noar aigen grond weerom, zunder ain achter te loaten.
²⁹ Ik zel mien gaist over t volk van Israël oetgaiten en heur rug nait meer toukeren – dat zegt God, de HEER.'”