Eerste braif aan Korintiërs Hou swoar of God zien dainst is (4: 6-17)

Eerste braif aan Korintiërs 04

⁰⁶En dat, bruiers en zusters, heb ik nou op Apollos en miezulm toupaasd. Dat dee k om joe: den kon ie aan ons dat taimke leren: “Nait meer van ain vroagen as wat in zien aanstellen staait.” Aans zol ie joe mor opbloazen véúr ain en tégen aander.
⁰⁷Wat veur gezag het ja dij man dij die de beste vindt? En wat hestoe dastoe nait kregen hest? Nou, astoe t den toch krégen hest, wat hest den te snaren, of zolst t nait kregen hebben?
⁰⁸Heb ie joe nou al dik en rond eten? Heb ie nou joen schoapkes al op t dreuge brocht? Bin ie zunder ons op troon kommen? Was t mor woar! Den konden wie ook n troon kriegen noast joe.
⁰⁹Mor nee, hur! Mie ducht ja: God het ons, apostels, aan t voutenèn zet, as lu dij dood injagd worden; en haile wereld, engels en mensken, krigt dat spektoakel te zain.
¹⁰ Wié binnen onwies om Christus, mor ié binnen verstandeg in Christus; wié binnen swak, mor ié staark; ié binnen in tel, mor óns hebben ze niks in reken.
¹¹ Aan nou tou heb we honger en dörst en gain fersounlek goud om t lief; krieg we op hoed, heb we gain vaast stee
¹² en pokkeln we om mit aigen handen kost te verdainen. Onder n regen van scheldwoorden dail we zegen oet; tegen n klopjacht mout we t oetholden;
¹³ laster krieg we over ons hèn, as we mensken bemoudegen. t Is zo wied: wereld wil ons wel deur t zinkgat spoulen; elk veegt ons vot as voel. Zo staait t aan nou tou der bie.

¹⁴ Nait om joe sneu te moaken, schrief ik dit, mor om joe as mien laive kinder terecht te wiezen.
¹⁵ Of zol ie ja nóg zoveul lu hebben om joe in Christus zien spoor te holden, veul voaders heb ie nait. Ik bin as ofgezant van Jezus Christus deur t evengelie joen voader worden.
¹⁶ Ik spoor joe der den ook op aan: neem n veurbeeld aan mie.
¹⁷ Doarom stuur k joe Timoteüs, dij de Heer mie as n laif en traauw kind geven het. Dij zel joe weer in t zin kommen loaten, hou of ik mie as ofgezant van Christus gedroag. Dij les kriegen ze overaal van mie, in elke gemainte.