2 Makkabeeërs Jeuden heur godsdainst verboden (6:1-17)

2 Makkabeeërs 06

⁰¹n Pooske loater stuurde keunenk Athener Geron. Dij mos Jeuden dwingen overleverns van heur veurolders op te geven en nait laanger noar God zien veurschriften te leven.
⁰²Deur zien toudoun wer tempel in Jeruzalem ontwijd en nuimd noar Zeus Olympius. Tempel op Gerizim wer in tied op verzuik van t volk van Sichem aan Zeus Xenius wijd.
⁰³Dizze offrontoatsie kwam aldernoarste haard aan bie t volk.
⁰⁴Vremde lu nammen tempel in bezit en huilen der wilde feesten. Ze vermoakten zok mit hoeren, deden t binnen haailege muren mit aandermans vraauwen en nammen alderhande onfersounlek spul mit in tempel.
⁰⁵t Altoar wer vol zet mit deur God verboden ovvers dij in stried mit veurschriften wazzen.
⁰⁶Sabbat in acht nemen mog nait laanger, net zo min as t vieren van veurolderlieke feesten of der veur oet te kommen dat men Jeud was.
⁰⁷Mit geweld werden Jeuden verplicht om elke moand mit te doun aan haaidense ovvermoaltieden op keunenk zien joardag, en op t feest veur Dionysus mozzen ze mit kraanzen van klimop op kop mitlopen in optocht veur Dionysus.
⁰⁸Op aanroaden van Ptolemeüs wer in aanswettende Griekse steden net zo'n soort dekreet ofkundegd, doar in ston dat Jeuden mitdoun mozzen aan haaidense ovvermoaltieden
⁰⁹en dat dijent dij waaigerden om zok aan Griekse gewoontes aan te pazen, doodmoakt worden mozzen. Hou swoar of tieden veur Jeuden worden wazzen, bleek wel
¹⁰ dou twij vraauwen opbrocht werden omdat ze heur zeuns besnieden loaten haren: mit heur potjes aan heur bòrsten ophongen, werden ze veur t oog van elkenain deur stad sleept en dou van stadsmuur ofsmeten.
¹¹ n Aander moal wazzen mensken stoef boeten stad in grotten bie nkander kommen om in t gehaaim zeuvende dag te vieren. Ze werden aan Filippus verroaden en aalmoal leventeg verbraand, want oet eerbied veur zo'n haailege dag haren ze zok nait verweren wild.

¹² Ik woarschaauw mien leesders om zok deur dizze rampen nait ofschrikken te loaten, mor te bedenken dat dizze stravven nait as doul haren ons volk der onderdeurgoan te loaten, mor om t beter te moaken.
¹³ t Is ja n bewies van grode goudens as zundoars nait te laank heur gaang goan kinnen, mor votdoalek straft worden.
¹⁴ De Heer haar noamelk onnaaierd ons aans te behandeln as aander volken: bie heur wacht e rusteg mit stravven tot ze moat van heur zunde vol moakt hebben,
¹⁵ mor ons straft e al, veurdat wie bie dat punt aankommen binnen.
¹⁶ Dat zodounde ontzegt hai ons zien barmhaarteghaid nooit. Hai let zien volk nooit allenneg, mor hai moakt ons beter deur ons mit rampen te trevven.
¹⁷ Mor loat we, noa joe dit mit n poar woorden in t zin brocht te hebben, weer wieder goan mit ons verhoal.