Ezechiël Profetaaiern over baargen van Seïr en Izrel (35: 1-36:15)

Ezechiël 35

⁰¹Ik kreeg dit woord van de HEER:
⁰²“Manmensk, richt die tou baargen van Seïr en profetaaier der tegen.
⁰³Zeg: 'Dit zegt God, de HEER: Ik zel joe kriegen, baargen van Seïr! Ik zel mien voest tegen joe omhoogsteken en n wildernis van joe moaken doar gain mensk meer touholdt.
⁰⁴Joen steden veraander ik in puunbulten, ik moak n wildernis van joe, en ie zellen waiten dat ik de HEER bin.
⁰⁵Aaltied heb ie vijandeg west tegen Isrelieten, ie hebben ze oetleverd aan t sweerd dou t onhaail heur trof, dou der mit heur ofrekend wer.
⁰⁶Doarom, zo woar as ik leef – zegt God, de HEER: Ik zel joen bloud lopen loaten en t bloud zel achter joe heer zitten. Bloud zel achter joe heer zitten omreden ie wazzen zo hoatsk dat ie bloud zain wollen.
⁰⁷Ik moak van baargen van Seïr n wildernis doar gain mensk meer touholdt en doar gainain meer deurhèn trekken zel.
⁰⁸Joen baargen zellen bezaaid wezen mit doden en gewonden. Op joen heuvels, in joen leegtes en in joen baargkloven zellen lieken liggen van heur dij deur t sweerd versloagen binnen.
⁰⁹Ik moak van joe veur aaid n wildernis mit steden doar gainent meer woont. Ie zellen waiten dat ik de HEER bin.
¹⁰ Ie hebben zegd: 'Dij twij volken en dij twij landen binnen mienent, ik zel ze in bezit nemen, ook al het de HEER doar woond.'
¹¹ Doarom, zo woar as ik leef – zegt God, de HEER: Ik zel kwoadens, hoat en nied vergelden doar ie heur mit bedraaigd hebben. Deur joe te stravven zellen ze vernemen wèl of ik bin.
¹² Ie zellen waiten dat ik de HEER bin. Aal joen lasterproat heb ik heurd, ales wat ie zegd hebben over baargen van Israël – dat ze verrinnewaaierd wazzen, dat ie ze plundern konden.
¹³ Tegen mie heb ie ook n grode mond had, mie heb ie ook taargd. Ik heb t wel heurd!

¹⁴ Dit zegt God, de HEER: Haile wereld zel zok ter om vernuvern as ik van joe n wildernis moak.
¹⁵ Joa, krekt zo as ie joe der om vernuverd hebben dat t volk van Israël heur laand verrinnewaaierd wer. Joe, baargen van Seïr, zel ik t zulfde aandoun: n wildernis zel ie wezen, ie en hail Edom derbie. Ze zellen waiten dat ik de HEER bin.'

⁰¹Manmensk, profetaaier tegen baargen van Israël. Zeg: 'Baargen van Israël, luster noar t woord van de HEER!
⁰²Dit zegt God, de HEER: Vijand het over joe roupen: 'Ha, dij stafolde baargen binnen nou van ons!'
⁰³Profetaaier doarom en zeg: 'Dou ie verrinnewaaierd wazzen, loerden aander volken om joe tou, op joen laand. Ie wazzen op t woord en werden berabbeld.
⁰⁴Luster doarom, baargen van Israël, noar God, de HEER, zien woorden. Dit zegt God, de HEER, tegen baargen en tegen heuvels, tegen revierdoalen en vlaktes, tegen verwilderde puunbulten en tegen verloaten steden, tegen ales wat roofd is en bespot deur aander volken om joe tou!
⁰⁵Dit zegt God, de HEER: Joa wis, in hetten van mien ofgunst kloag ik Edom aan en aal dij aander volken derbie. Ze muiken zok blied om t verdrait van n aander, ze zatten vol minachten dou ze zok mien laand touaigenden en t gruinlaand roofden.'
⁰⁶Doarom mostoe profetaaiern over t laand van Israël. Zeg tegen baargen en tegen heuvels, tegen revierdoalen en vlaktes: 'Dit zegt God, de HEER: Ik heb t tegen joe, ofgunsteg en kwoad dat k bin! Ie binnen vernederd deur aander volken,
⁰⁷en doarom – zegt God, de HEER – dou ik ter n aid op dat volken om joe tou zulm vernederd worden zellen.
⁰⁸Mor, baargen van Israël, joen bomen zellen weer oetlopen en vrucht droagen veur mien volk Israël, want dat zel al gaauwachteg weer thoeskommen.
⁰⁹Ik zel mie om joe bekommern, en ie zellen weer bewaarkt en inzaaid worden.
¹⁰ Ik zel n haile bult mensken op joe wonen loaten, t haile volk van Israël. Steden zellen weer bewoond worden en puunbulten weer opbaauwd.
¹¹ Ik zel n haile bult mensken en daaiern op joe wonen loaten, machteg in getal zellen ze worden en vruchtboar wezen. Der zel weer krekt zoveul volk te wonen kommen as in laankmanstied. Ik zel der veur zörgen dat t mit joe nog beter gaait as eertieds, en ie zellen besevven dat ik de HEER bin.
¹² Der zel weer volk over joe omlopen: mien volk Israël zel joe weer in bezit nemen, ie worden veur aaid heur aigendom en ze zellen joe joen kinder nooit weer ofhoalen.

¹³ Dit zegt God, de HEER: Men zegt van joe dat ie mensken verslinden, dat ie volken dij op joe leven, heur kinder ofhoalen.
¹⁴ Mor ie zellen gain mensken meer verslinden en joen volken heur kinder nait meer ofhoalen – zegt God, de HEER.
¹⁵ Ik zel der veur zörgen dat ie schimp van aander volken nait meer verduren en heur spot nait meer heuren huiven. Ie zellen joen volken nait laanger heur kinder ofhoalen – dat zegt God, de HEER.'”