2 Makkabeeërs Jason vaalt Jeruzalem aan (5:1-10)

2 Makkabeeërs 05

⁰¹Om dij tied, dou Antiochus zien twijde veldtocht tegen Egypte ondernam,
⁰²wazzen der zo om en bie vatteg doag overaal in Jeruzalem verschienens te zain. Der reden ofdailens ruters deur lucht. Ze haren mit golddroad bestikte jazzen aan, wazzen bewoapend mit laange speren
⁰³en mit oettrokken sweerden. Men zag ze van weerskanten tegen nkander inrieden, mit swaaiende schilden, n bos speren en n regen pielen, heur harnazzen schitternd van golden versiersels.
⁰⁴Elkenain beedde dat dizze verschienens n goud veurtaiken wezen moggen.

⁰⁵Dou t proatje ging dat Antiochus sneuveld was – mor dat was nait zo -, brochde Jason op zien minst doezend man op n bainen en dee onverwachts n aanvaal op stad. Dou manlu dij stad verdedegden, terugdreven wazzen en stad innomen wer, zöchte Menelaüs n goud hènkommen in börg.
⁰⁶Jason slachtte zunder meedlieden zien aigen stadsgenoten òf. Hai haar nait deur dat n overwinnen op aigen volk, dikste neerloag betaikent. Hai ging tekeer of e nait over aigen volk mor over zien slimste vijanden boas worden mos.
⁰⁷Toch kreeg e t nait veurnkander macht in handen te kriegen. Dat wer van dij gevolgen dat e der mit schoade en schaande òf kwam en vannijs oetwieken mos noar Ammon.
⁰⁸Op t lest laip t slecht mit hom òf. Noadat e vastzeten haar bie keunenk Aretas van Arabië, vluchtte hai van aine stad noar aander tou. Deur elkenain veracht as n ofvalege kerel, hoaten as beul van zien aigen volk en voaderlaand, wer e aal mor weer votjagd tot e as balleng in Egypte te laande kwam.
⁰⁹Doarvandoan ging hai mit schip noar Lakedemonië. Hai hoopte doar beschaarmen te vinden vanwegens femiliebanden. Man dij zo'n bult lu oet heur voaderlaand verdreven haar, kwam nou zulm in n vremd laand oet tied.
¹⁰ Om hom, dij zoveul lieken onbegroaven liggen loaten haar, luit gainain n troan of bewees hom leste eer. Hai kreeg alderdeegs gain stee in t graf van zien veurolders.