Wieshaid van Jezus Sirach Vrundschop (6:5-17)

Wieshaid van Jezus Sirach 06

⁰⁵Haddelke woorden moaken n bult vrunden,
dij innemende dingen zegt, krigt n vrundelk weerwoord.

⁰⁶Loat n bult lu as vrund mit die omgoan,
mor loat mor ain oet doezend dien roadsman wezen.

⁰⁷Astoe ain tou vrund moaken wilst,
perbaaier hom den eerst oet, vertraauw hom nait te vlog.

⁰⁸Paardie vrunden binnen bloots dien vrund in goie tieden,
in minne tieden vernemst ze nait.

⁰⁹Der binnen vrunden dij inainen dien vijand worden,
en joen roezie, tot dien schaande, aan grode klok hangen.

¹⁰ Der binnen vrunden dij mit die bie toavel zitten,
mor in minne tieden vernemst ze nait.

¹¹ Zo laank as die t goud gaait, lopen ze achter die aan
en goan ze goudmoudeg mit dien knechten om;

¹² mor as t min mit die gaait,
keren ze zok tegen die en loaten die in steek.

¹³ Blief dien vijanden oet weeg,
en hol dien vrunden in de goaten.

¹⁴ n Traauwe vrund is n vaailege schoelstee,
dij der ain vonden het, het n schat vonden.

¹⁵ n Traauwe vrund is nait te betoalen,
tegen zien weerde weegt niks op.

¹⁶ n Traauwe vrund is t beste meedsien,
dij ontzag het veur de Heer vindt zo'n vrund.

¹⁷ Dij ontzag het veur de Heer zöcht goie vrunden oet,
krekt as e zulm is, binnen zien vrunden ook.