Braif aan Filippiërs Zegen van Paulus zien gevangenschop (1:12-30)

Braif aan Filippiërs 01

¹² Bruiers en zusters, ie mouten waiten dat wat of ik hier deurmoaken mout, t verkundegen van t evengelie bepoald goud doan het.
¹³ Doar is t ja deur kommen dat aan t haile hòf en aan ale aandern dudelk worden is dat ik bloots om Christus vastzit.
¹⁴ En mainste bruiers in de Heer hebben deur mien gevangenschop vertraauw kregen om mit des te meer moud God zien woord zunder baang te wezen te spreken.
¹⁵ Gounent dounen dat den wel oet nied en stried, mor aandern verkundegen Christus mit goie bedoulens.
¹⁶ Bie dij lesten zit ter laifde achter. Zai waiten wel dat ik aansteld bin om veur t evengelie op te kommen.
¹⁷ Mor dij aandern verkundegen Christus om te steukeln. Ze mainen t nait van haarten en denken dat mien banden mie nog meer kniepen zellen.

¹⁸ Wat zol t ook! In elks gevaal, of ze t nou mit of zunder biebedoulens doun: Christus wordt verkundegd. Doar bin k blied om. En der staait mie nog meer bliedschop te wachten.
¹⁹ Ik wait ja dat dit op mien behold oetlopen zel, deurdat op joen gebed Jezus Christus zien Gaist mie toudaild wordt.
²⁰ Doar kiek ik den ook noar oet en doar reken ik op. Ik wait dat ik ter in gain enkeld opzicht sneu ofkommen zel. Nee, veur t oog van haile wereld zel, net as aaltied, nou ook Christus eerd worden.
²¹ Veur mie is t levent ja Christus. En doarom win ik ter bie as k staarf.
²² As ik nog wat levent te goud heb hier op wereld, den plok ik doar de vrucht van dat ik nog wat doun mag. En nou wait ik nait recht wat of ik kaizen mout.
²³ Ik zit ter aal mor tussen: aan ain kaant verlang ik ter noar om op te breken en bie Christus te wezen. Dat was t alderbeste ja.
²⁴ Mor om joe is t neudeger dat ik hier nog op wereld blief.
²⁵ En nou k doarvan overtuugd bin, wait ik dat ik leven blieven zel, en aalweg bie joe aalmoal wezen zel. Zodat bliedschop van t geleuf in joe aanwint.
²⁶ Zo zel ie, as k weer bie joe kom, nog meer over mie snaren kinnen, in Christus Jezus.

²⁷ Ain ding mout k nog zeggen: ie mouten joe zo aanstellen as dat mit Christus zien evengelie te riemen is. Den kin ik, netgliek of ik kommen kin en joe weer te zain krieg of dat ik ter nait bin, van joe heuren dat ie vaststoan in ain gaist, as ain man striedend veur t geleuf in t evengelie.
²⁸ Ie mouten joe haildaal nait baang moaken loaten deur tegenstanders. Dat is veur heur n aanwiezen van heur ondergang, mor van joen redden. En dat is te daanken aan God.
²⁹ Joe is t ja vergund veur Christus … joa, ook in hom te leuven, mor dat nait bloots, ook veur hom te lieden.
³⁰ Ie hebben aigenste stried as ik: dat heb ie destieds van mie zain kind en dat heur ie nou van mie.