t Evengelie volgens Marcus Geliekenis over t zoad (4: 1-20)

t Evengelie volgens Marcus 04

⁰¹Op n keer begunde Jezus weer aan kaant van t meer onderricht te geven. Haile koppels volk stroomden op hom tou, zoveul, dat e in n boot zitten ging op t wotter. t Volk bleef op kaant van waal.
⁰²Hai leerde heur haile veul en bruukte doar geliekenizzen bie:
⁰³“Luster es!” zee e. “Der was ais n boer. Dij ging aan t zaaien.
⁰⁴En wat wil t gevaal? Bie t zaaien vuil n dail van t zoad bie pad langs. Dou kwammen der vogels aan en dij pikten t op.
⁰⁵n Aander dail kwam in staingrond te laande. Doar lag mor n dun loagje grond. t Zoad kwam al gaauwachteg op: t lag ja nait daip.
⁰⁶Mor dou zun opkommen was, verbraandde t en omdat t gain worrels zet haar, verdreugde t.
⁰⁷Weer n aander dail kwam maank stiekels te laande. Dij schoten op en smoorden t zoad, zodat t niks opbrochde.
⁰⁸Wat ter over was, vuil in goie grond; t kwam goud op en zette vrucht: n dail smeet dattegmoal zoveul op, n dail sesteg- en nog n dail honderdmoal zoveul.”
⁰⁹Hai zee der bie: “Wèl oren het, mout ter ook mit lustern!”

¹⁰ Dou ze weer onder nkander wazzen, vruigen zien kammeroaden en de twaalm hom of e dij geliekenizzen oetleggen wol.
¹¹ “Joe is t gehaaim van Gods keunenkriek aanvertraauwd,” zee e, “mor boetenstoanders mouten t mit geliekenizzen doun,
¹² zodat ze schaarp kieken zellen en niks zain, inspannen lustern, mor niks begriepen, aans zollen ze ja n nij levent begunnen en vergeven kriegen.

¹³ As ie dizze geliekenis nait begriepen,” zee Jezus tegen heur, “welke begriep ie den aal?
¹⁴ Dij zaait, zaait t woord.
¹⁵ Dit binnen mensken op t pad doar of t woord zaaid wordt: mor naauw hebben ze t heurd of soatan komt en pikt heur t woord dat in heur zaaid is, òf.
¹⁶ Dit binnen de mensken dij op staingrond zaaid worden: zo gaauw as dij t woord heuren, nemen ze t blied aan.
¹⁷ Mor t het bie heur gain worrel schoten, t binnen mensken van n ogenslag. As ze loater in verdrokken kommen of achternoazeten worden, den gonnen ze der mor zo veur omliggen.
¹⁸ Nog weer aandern binnen zai dij maank stiekels valen. Dat binnen mensken dij t woord wel heurd hebben,
¹⁹ mor den kommen zörg om t bestoan en verneukerij van riekdom en longerderij noar van ales en nog wat, en dij smoren t woord. t Zet gain vrucht.
²⁰ Dit binnen mensken dij in goie grond zaaid binnen: zai heuren t woord, nemen t aan en brengen datteg-, sesteg-, joa honderdmoal zoveul op.”