Ezechiël Elkenain wordt oordaild noar zien doaden (33: 1-33:20)

Ezechiël 33

⁰¹Ik kreeg dit woord van de HEER:
⁰²“Spreek, manmensk, zeg tegen dien laandslu: 'As ik t sweerd op n laand ofstuur en t volk dat doar woont het ain as wachter aansteld,
⁰³en dij wachter zugt t sweerd op t laand ofkommen en blast op hoorn om t volk te woarschaauwen,
⁰⁴en as den ain t geluud van hoorn heurt, mor zok ter niks van aantrekt, en t sweerd komt en moakt hom dood, den het e zien dood aan zokzulm te wieten.
⁰⁵Hai het t geluud van hoorn aal heurd, mor der zok nait deur woarschaauwen loaten, dat zodounde het e zulm dood over zok ofroupen. Haar e zok woarschaauwen loaten, den haar e zien levent ter ofred.
⁰⁶Wat wachter aanbelangt, as e t sweerd aankommen zugt, mor nait op hoorn blast om t volk te woarschaauwen, en as t sweerd den komt en ain doodmoakt, den staarft dij mensk omreden hai het zulm schuld, mor ik zel wachter veur zien dood aanspreken.'

⁰⁷Die, manmensk, heb k as wachter aansteld veur t volk van Israël. Astoe mien woorden heurst, mostoe heur oet mien noam woarschaauwen.
⁰⁸As ik tegen n min mensk zeg dat e staarven zel, en doe zegst hom nait dat e n aander pad opgoan mout, den zel e staarven om zien aigen schuld. Mor die zel ik veur zien dood aanspreken.
⁰⁹Mor astoe hom woarschaauwd hest dat e n aander pad opgoan mout en hai dut dat nait, den staarft e om zien aigen schuld, mor doe zelst t levent ter ofredden.

¹⁰ Manmensk, zeg tegen t volk van Israël: 'Ie zeggen “Ons misdoaden en ons zunden worden ons aanrekend en wie goan der onderdeur – hou kin we den nog in leven blieven?”'
¹¹ Zeg tegen heur: 'Zo woar as ik leef – zegt God, de HEER -, n min mensk zien dood moakt mie haildaal nait blied. Ik wil dat e n aander pad opgaait en in leven blift. Kom toch weerom van verkeerde poaden dij ie opgoan binnen. Geef t op, want woarom zol ie staarven, volk van Israël?'

¹² Manmensk, zeg tegen dien laandslu: 'Rechtveerdeghaid van n goud mensk zel hom nait redden as e n misdoad begaait. En minne doaden van n min mensk zellen hom nait stroekeln loaten as e zok doar van ofkeren dut. n Goud mensk zel nait deur zien goie doaden in leven blieven as e n zunde begaait.
¹³ As ik tegen rechtveerdege zeg dat e in leven blieven zel, en as e den, wis van zien aigen rechtveerdeghaid, onrecht dut, den zellen aal zien goie doaden nait meer tellen, mor zel e staarven om t onrecht dat e doan het.
¹⁴ En as ik tegen n min mensk zeg dat e staarven zel, en hai keert zok van zien zunde òf, hai is traauw aan mie en dut t goie –
¹⁵ hai geft weerom wat e as paand kregen het, vergoudt wat of e stolen het, hai holdt zok noar wetten dij op t levent aangoan deur gain onrecht meer te doun – den zel e in leven blieven en nait staarven.
¹⁶ Ale zunden dij e begoan het, zellen hom nait meer aanrekend worden. As hai traauw aan mie is en t goie dut, zel e in leven blieven!'
¹⁷ Dien laandslu maggen den zeggen: 'De HEER zien weg is onrechtveerdeg,' mor t is heur áigen weg dij onrechtveerdeg is!
¹⁸ As n goud mensk van zien rechtveerdeg pad ofgaait en onrecht dut, zel e doarom staarven.
¹⁹ As n min mensk van zien verkeerde pad ofgaait, traauw aan mie is en t goie dut, den zel e doarom leven.
²⁰ Ie zeggen: 'De HEER zien weg is onrechtveerdeg!' Volk van Israël, ik zel elk van joe oordailen al noar t pad dat e gaait!”