t Evengelie volgens Matteüs t End van wereld (24: 1-28)

t Evengelie volgens Matteüs 24

⁰¹Jezus kwam tou tempel oet en ging wieder. Zien leerlingen kwammen noar hom tou en wezen hom op tempelgebaauwen.
⁰²“Kiek joe dat altmoal ais aan,” zee Jezus tegen heur. “Mor neem van mie aan: gain stain dervan zel op n aander liggen blieven. Ales gaait tegen de vlakte!”

⁰³Op Olievenbaarg ging e zitten en zien leerlingen kwammen bie hom. Dou ze mit hom allain wazzen, vruigen ze: “Nou mout ie ons toch ais vertellen wanneer dat dat wezen zel en woar of je aan zain kinnen dat ie weer kommen en dat wereld op t èn lopt.”
⁰⁴“Wees ter op verdocht dat gainent joe wat wiesmoakt,” was Jezus zien antwoord.
⁰⁵“Der zellen hail wat kommen onder mien noam en zeggen: 'Ik bin de Christus.' Doar zellen ze hail wat lu mit op biesterboan brengen.
⁰⁶Ie zellen van oorlogen en van proat over oorlogen heuren. Mor loat joe nait oetstuur brengen. Dat mout altmoal gebeuren, mor t èn is dat vot nog nait.
⁰⁷t Aine volk zel ja tegen t aander in opstand kommen en t aine keunenkriek tegen t aander. Der zellen hongersnoden wezen en eerdbevens, nou hier en den doar.
⁰⁸Mor dat is altmoal nait meer as t begun van ale ellèn.
⁰⁹Den zellen ze joe onder drok zetten en doodmoaken. Ale volken zellen joe mit n schaive nek aankieken omreden ie kommen veur mie oet.
¹⁰ En den zellen n bult mensken t opgeven, nkander verroaden en hoaten.
¹¹ Den zellen veul vaalze profeten aantreden dij mensken op t verkeerde pad brengen.
¹² En omdat t levent zunder god of gebod aal meer aanwazen dut, zel laifde onder mensken kold worden.
¹³ Mor wèl volholdt aan t èn tou dij zel red worden.
¹⁴ Bliede bosschop van t keunenkriek zel over haile wereld bekend moakt worden as n getugenis veur ale volken. En den zel t èn der heer wezen.

¹⁵ As ie den in dizze haailege stee 'iezelke ofbroak' stoan zain, profeet Daniël het t ter over had, – en wèl of t leest, mout goud acht geven –
¹⁶ den mouten lu dij in Judea touholden, baargen in vluchten.
¹⁷ Wèl of op t platdak van zien hoes touholdt, mout nait ommeneden kommen om zien hoesgroad op te hoalen.
¹⁸ Dij boeten op t laand is, mout nait weeromkommen om zien jak op te hoalen.
¹⁹ Aarme stumpers van vraauwlu dij in dij doagen in verwachten binnen of n lutje aan bòrst hebben!
²⁰ Beed mor gaauw dat t gain winter of sabbat is as ie aan hakken trekken mouten.
²¹ Want t zel der n big om weg goan, zo as wereld nog nooit mitmoakt het van t begun òf, aan nou tou. En zo slim zel t ook nooit weer worden.
²² As dij doagen nait inkòrt worden zollen, gain mensk zol t ter ofredden. Mor om heur dij oetkeurd binnen, zellen dij doagen inkòrt worden.
²³ Leuf t mor nait, as ain tegen joe zegt: 'Kiek, hier is de Christus,' of: 'Doar is e.'
²⁴ Der zellen ja hail wat lu kommen dij beweren dat ze de Christus binnen, of n profeet. Grode taikens en wonders zellen ze doun om, as t aaids meugelk wezen zol, alderdeegs dij oetkeurd binnen op biesterboan te brengen.
²⁵ Paas op! Ik heb joe aaltied al woarschaauwd!
²⁶ As mensken tegen joe zeggen: 'Kiek es, hai is in woestijn,' goa doar den nait hèn. Of as ze zeggen: 'Kiek es, hai is doar in hoes,' leuf der den niks van.
²⁷ t Zel mit Menskenzeun zien komst krekt zo goan as t mit weerlicht gaait. Dij komt oet t oosten en in t westen zai je hom nog.
²⁸ Overaal doar n dood daaier ligt, doar kommen gieren mitnkander op òf.