t Evengelie volgens Matteüs Geliekenis over talenten (25:14-30)

t Evengelie volgens Matteüs 25

¹⁴ t Is ja net as mit n man dij noar t boetenlaand ging. Hai raip zien knechten bie zok en vertraauwde heur zien haile boudel aan.
¹⁵ Aan ain gaf e vief talenten, n aander twij en n daarde gaf e ain – noar wat elk aan kon. Dou raaisde hai òf.
¹⁶ Dij vief talenten kregen haar, ging der mit aan slag en verdainde der nog vief bie.
¹⁷ Krekt zo verdainde man dij twij kregen haar der twij bie.
¹⁸ Mor knecht dij ain kregen haar, dee t aans: hai muik n gat in grond en stopte doar boas zien geld in bezied.

¹⁹ Boas bleef laank vot en dou e weeromkwam, rekende hai mit knechten òf.
²⁰ Dij vief talenten kregen haar, kwam en legde der nog vief bie. 'Boas,' zee e, 'ie hebben mie vief talenten geven. Mout je ais kieken: k heb ter nog vief mit verdaind.'
²¹ 'Mooi zo!' zee boas. 'Doe bist n goie en traauwe knecht. Mit n luk beetje bist traauw omgoan, over n haile bult zel ik die aanstellen. Kom der in, goa mit boas feestvieren!'
²² Twijde kwam der ook aan. 'Boas,' zee e, 'twij talenten heb ie mie aanvertraauwd. Kiek ais hier: k heb ter nog twij mit verdaind!'
²³ 'Mooi zo!' zee boas. 'n Beetje hestoe goud beheerd, over n bult zel ik die aanstellen. Kom der in, goa mit boas feestvieren!'
²⁴ Man mit dat aine talent kwam ook. 'Boas,' zee e, 'k wait dat ie gain makkelke binnen! Ie zichten wat of ie nait zaaid hebben en ie mennen wat ie nait oetstreud hebben.
²⁵ k Was benaauwd veur joe en heb joen talent in grond bezied stopt. Kiek, hier heb ie joenent weerom!'
²⁶ 'Wat bistoe veur n minne en lòie knecht!' zee boas tegen hom. 'Doe wost ja, dat ik zicht wat ik nait zaaid heb en dat ik men wat ik nait oetstreud heb!
²⁷ Haarst ja mien geld op baank zetten kind. Den haar ik dou k thoeskwam, mien geld mit rente weeromkregen.
²⁸ Doarom: pak hom dat talent òf en geef dij aan hom dij al tien het.
²⁹ Want elk dij wat het, krigt ter nog wat tou. Den het e meer as genog. Mor wèl of niks het, zel ook nog ofpakt worden wat of e het.
³⁰ Smiet dij onnut van n knecht der mor oet, in t routduustern. Doar zellen ze hoelen en mit tanden knaarzen!'