t Evengelie volgens Matteüs Geliekenis over tien wichter (25: 1-13)

t Evengelie volgens Matteüs 25

⁰¹Den zel t mit t hemels keunenkriek goan as mit dij tien wichter dij brudeman in muit gingen – laamp in haand.
⁰²Vief van heur wazzen wies, vief nait.
⁰³Dij onwieze wichter nammen ja wel heur lanteerns mit, mor gain eulie.
⁰⁴Mor wieze wichter nammen nait allenneg lanteerns mit, mor ook n klipke eulie.
⁰⁵Nou luit brudeman wat laank op zok wachten en wichter werden soesderg en vuilen in sloap.
⁰⁶Midden in naacht wer der roupen: 'Doar komt brudeman aan! Hom in muit!'
⁰⁷Dou kwammen ale jongwichter in t èn en muiken heur lanteerns in odder.
⁰⁸'Geef ons wat eulie van joe!' zeden onwieze wichter tegen wiezen. 'Lanteerns goan ons ja oet!'
⁰⁹'Nee hur!' zeden dij, 'dat dou we nait! Den heb we meschain nait genogt, en ié ook nait! Goa mor noar paitereuliekerel tou en koop joe doar wat!'
¹⁰ En krekt dou ze vot wazzen om eulie te kopen, kwam brudeman dou nait! Wichter dij kloar wazzen, gingen mit hom noar bruloft en deur ging op slöt.
¹¹ Eefkes loater kwammen dij aander wichter weerom. 'Hé, heer, loat ons der ook in!' raipen ze.
¹² Mor hai zee: 'Ik ken joe nait! Zekerwoar, nait!'
¹³ Doarom mout ie woaks wezen! Ie waiten ja nait van uur of tied!