t Evengelie volgens Matteüs Menskegeboden en God zien gebod (15: 1-20)

t Evengelie volgens Matteüs 15

⁰¹Dou kwammen der oet Jeruzalem Farizeeërs en schriftgeleerden bie Jezus. Ze vruigen:
⁰²“Woarom doun joen leerlingen nait wat of ons veurolden aaltied deden? Ze wasken heur handen ja nait veur t broodeten!”
⁰³“En ie den?” zee hai. “Woarom hol ie joe nait aan God zien gebod, mor hol ie aal vaast aan wat of joen veurolden deden?
⁰⁴God het ja zegd: 'Hol joen pa en moeke in eren' en 'Wèl zien pa of moeke vervlökt, mout doodmoakt worden.'
⁰⁵Mor ie moaken der van: 'Wèl of tegen zien pa of moeke zegt: “Woar of ik joe mit helpen kind haar dat heb k as n ovver votgeven,'” dij huift zien pa of moeke nait in eren holden.
⁰⁶Zo heb ie God zien gebod kracht ofnomen omwille van wat of joen veurolden deden.
⁰⁷Kemediespeulers bin ie! Jesaja haar geliek dou e over joe zegd het:

⁰⁸'Dit volk eert mie mit zien mond,
mor heur haart is wied van mie òf.

⁰⁹Dat ze mie eren, het niks om hakken,
wat of zai veur woarhaid oetgeven,

binnen allain mor menskengeboden.'”

¹⁰ Dou e t volk bie zok roupen haar, zee e tegen heur: “Luster en begriep mie goud!
¹¹ Nait wat of tou mond ingaait, nee, wat of ter oetkomt, dát moakt ain onnuur!”

¹² Leerlingen kwammen bie hom. “Wait ie wel,” zeden ze, “dat Farizeeërs zok aargerd hebben dou ze joe dat zeggen heurden?”
¹³ Hai antwoordde: “Ale pootgoud dat mien Voader in hemel nait poot het, zel der oetropt worden.
¹⁴ Loat dij lu mor geworden! Zulm binnen ze blind en willen aander blinde lu t pad wiezen. En as d'aine blinde d'aander bie haand pakt, valen baaident in n koel.”
¹⁵ “Leg ons dij geliekenis ais oet,” zee Petrus tegen hom.
¹⁶ “Heb ie der ook nog aaltied gain besef van?” vruig e.
¹⁷ “Begriep ie nait dat aal wat of tou mond ingaait in moag te laande komt en der op t gemak weer oetkomt?
¹⁸ Mor dat wat tou mond oetgaait, komt tou t haart oet, en dát moakt mensken onnuur.
¹⁹ Oet t haart kommen ja minne gedachten, moord, traauwbreuk, ontucht, daiverij, vaalze verkloarens en godslastern.
²⁰ Dát binnen de dingen dij n mensk onnuur moaken. Mor as ain veur t eten zien handen nait wast, dat moakt hom nait onnuur.”