t Evengelie volgens Matteüs Jezus oetdoagd (4: 1-11)

t Evengelie volgens Matteüs 04

⁰¹Dou wer Jezus deur Gaist noar woestijn brocht om deur duvel oetdoagd te worden.
⁰²Noadat e vatteg doagen en vatteg nachten vast haar, kreeg e op t leste honger.
⁰³Op dat ogenblik kwam oetdoager op hom tou. Dij zee: “As ie God zien Zeun binnen, zeg den ais tegen dij vlinten dat zai brood worden mouten.”
⁰⁴Mor Jezus antwoordde: “Der staait schreven: 'n Mensk zel nait enkeld van brood leven: hai leeft van elk woord dat oet mond van God komt.'”
⁰⁵Dou nam duvel hom mit noar haailege stad tou en zette hom op raand van tempeldak.
⁰⁶“As ie God zien Zeun binnen,” zee e tegen hom, “spring hier den es òf. Der staait ja schreven: 'Hai zel zien engels veur joe bestellen en op heur handen zellen ze joe droagen, dat ie joen vout nait aan n vlint steuten zellen.'”
⁰⁷Dou zee Jezus tegen hom: “Der staait ook schreven: 'Ie zellen de Heer, joen God, nait oetdoagen.'”
⁰⁸Duvel nam hom nog ais mit noar n haile hoge baarg tou. Hai luit hom ale keunenkrieken van wereld zain mit aal heur pronk en pracht.
⁰⁹“Dat zel k joe altmoal geven,” zee e, “as ie veur mie op knijen valen en mie aanbeden doun.”
¹⁰ Dou zee Jezus tegen hom: “Goa vot, soatan! Der staait ja schreven: 'Ie zellen de Heer, joen God, aanbeden en hom allain dainen.'”
¹¹ Dou luit duvel hom mit vree en engels kwammen om hom te bedainen.