t Evengelie volgens Matteüs Jezus en sabbat (12: 1-21)

t Evengelie volgens Matteüs 12

⁰¹Op n sabbat laip Jezus deur stokken koorn hèn. Zien leerlingen werden gammel. Ze begunden oaren òf te strupen en atten t koorn op.
⁰²Farizeeërs zagen dat. Ze zeden tegen hom: “Kiek toch ais! Joen leerlingen doun wat, dat op sabbat nait mag!”
⁰³Hai antwoordde heur: “Heb ie den nait lezen wat of David doan het dou hai en zien manlu honger kregen?
⁰⁴Hai ging in God zien hoes en at mit zien manlu broden op dij op t altoar laggen. Dat mog e toch nait doun? En zien manlu toch net zo min? Priesters maggen dij toch allenneg mor opeten?
⁰⁵Of heb ie nait lezen in wet dat priesters dij op sabbat in tempel dainstdoun, aal sabbatswet overtreden, mor dat heur t nait aanrekend wordt?
⁰⁶Mor ik zeg joe: hier gaait t om meer as allain om tempel.
⁰⁷As ie begrepen haren wat of t betaikent: 'Barmhaarteghaid, doar gaait mie t om, nait om ovvers,' den haar ie onschuldege lu nait veroordaild.
⁰⁸Menskenzeun is ja boas over sabbat!”

⁰⁹Hai ging doarvandoan wieder en kwam bie heur in sinagoge.
¹⁰ Doar was net ain mit n verschrompelde haand. Ze vruigen hom: “Mag je op sabbat wel mensken beter moaken?” Ze wollen hom ja aanbrengen.
¹¹ “Heur ais!” zee e. “Ain van joe het n schoap. Dij vaalt in n koel. Op sabbat! Zol e t daaier den nait vot tou koel oettrekken?
¹² n Mensk is toch zeker veul en veul meer weerd as n schoap? Doarom mag ie ook op sabbat mensken beter moaken.”
¹³ Dou zee e tegen man: “Steek joen haand ais oet!” Dat dee e en dij haand wer krekt zo zond as aander.
¹⁴ Farizeeërs gingen tou sinagoge oet en beroadden zok hou of ze hom om haals brengen konden.
¹⁵ Mor Jezus haar dat deur en week doarom oet noar n aander stee.
n Tjucht volk ging achter hom aan. Hai muik aal heur zaiken beter,
¹⁶ en wol nait lieden dat ze hom kundeg muiken.
¹⁷ Zo wer woarhaid wat profeet Jesaja zegd het:

¹⁸ “Kiek, mien knecht, dij ik oetkeurd heb:
mien laiverd, n mensk noar mien haart.

Mien Gaist leg ik op hom,

haaidens zel e t oordail verkundegen.

¹⁹ Gain roezie zel e moaken of bèlken,
zien stem zellen ze op stroat nait heuren.

²⁰ t Raait dat knikt is, zel e nait breken,
pit dij kwaalmt, zel e nait doven,

aleer hai t recht winnen loaten het.

²¹ Haaidens zellen op zien noam heur hoop zetten.”