t Evengelie volgens Matteüs Leerlingen begriepen t nait (16: 5-12)

t Evengelie volgens Matteüs 16

⁰⁵Leerlingen voarden noar overkaant. Loat ze nou t brood vergeten hebben!
⁰⁶“Kiek goud oet,” zee Jezus tegen heur. “Paas op veur zoerdaig van Farizeeërs en Sadduceeërs.”
⁰⁷Zai pruiten der onder nkander over deur: “Dat zegt e omdat wie gain brood mitnomen hebben.”
⁰⁸Jezus kreeg dat in de goaten. “Ie haalfwasgeleuvegen!” zee e. “Woarom heb ie t ter over dat ie gain broden bie joe hebben?
⁰⁹Heb ie t nog altied nait onder t verstand? Denk ie den nait meer aan dij vief broden veur viefdoezend man? Houveul körf heb ie doar nait bie nkander hoald?
¹⁰ En den dij zeuven veur vaaierdoezend man, houveul ie doar nait bie nkander hoald hebben?
¹¹ Hou is t meugelk! Heb ie nou nog nait deur dat ik t nait over gewoon brood haar? Nee, ie mouten oppazen veur Farizeeërs en Sadduceeërs heur zoerdaig!”
¹² Dou eerst begrepen ze dat hai heur nait woarschaauwen wol veur zoerdaig dat in stoet bruukt wordt, mor veur dat, wat Farizeeërs en Sadduceeërs leren.