t Evengelie volgens Matteüs Wiezen oet t oosten (2: 1-12)

t Evengelie volgens Matteüs 02

⁰¹Dou Jezus in Herodes zien tied geboren was in Betlehem, in kontrainen van Juda, kwammen der wiezen oet t oosten in Jeruzalem aan.
⁰²Dij vruigen: “Woar holdt keunenk van Jeuden tou dij kòrtsleden geboren wezen mout? Wie hebben zien steern ja zain in t oosten en wie binnen kommen om hom eer te bewiezen.”
⁰³Keunenk Herodes heurde der van. Hai kreeg schrik op hoed. En hai nait allenneg, hail Jeruzalem nait minder.
⁰⁴Hai dee ale opperpriesters en schriftgeleerden van t volk bie nkander roupen om der achter te kommen woar of de Christus geboren worden zol.
⁰⁵“In Betlehem in Judea,” zeden ze. “Zo staait t ja bie profeet schreven:
⁰⁶'Betlehem (laand van Juda), bist lang nait de minste van Juda zien laaiders. Oet die zel n laaider kommen dij mien volk Israël zien hedder wezen zel.'”
⁰⁷Dou raip Herodes de wiezen in t gehaaim bie zok en heurde heur oet wat tied steern persies verschenen was.
⁰⁸Hai stuurde heur noar Betlehem tou. “Perbaaier zo goud meugelk oet te zuiken hou of t mit dat jonkje zit,” zee e. “As ie hom vonden hebben, mout ie mie tieden geven, den goa ik ter ook hèn en breng hom eer.”
⁰⁹Dou ze van keunenk heurd haren wat e wol, gingen ze op pad. En kiek, steern dij zai in t oosten stoan zain haren, ging veur heur oet en bleef stilstoan boven stee doar t kind was.
¹⁰ Dou zai steern zagen, werden ze deurhèn blied.
¹¹ Ze gingen tou t hoes in en zagen t kind mit zien moeke Maria. Ze vuilen op knijen en bewezen hom eer. Ze huilen heur kostboarheden veurndag en gavven hom dij: gold, wierook en mirre.
¹² Omdat ze in n dreum deur God woarschaauwd wazzen nait weer noar Herodes tou te goan, gingen ze n aander pad langs noar heur laand tou.