Numeri Vuurovver (15:1-16 )

Numeri 15

⁰¹Dou sprak de HEER tegen Mozes mit te zeggen:
⁰²“Proat mit Isrelieten en zeg heur: 'As ie in t laand kommen dat ik joe as woonstee geven zel,
⁰³en ie brengen van rundvij of van schoapen of ooibokken de HEER n vuurovver, t mag n brandovver wezen of n slachtovver, of n ovver om n gelofte te wijden of as n vrijwillege goave of as n ovver op n hillege dag, om de HEER n aangenoame geur kloar te moaken,
⁰⁴den mout degene dij zien goave aan de HEER aanbudt, as meelovver der n tiende efa waaitenbloum biedoun, aanmengd mit n kwaart hin eulie
⁰⁵en n wienovver: n kwaart hin veur elke jonge ram bie t brandovver of t slachtovver.
⁰⁶Bie n ram mout ie as meelovver twij tiende efa waaitenbloum doun, aanmengd mit n daarde hin eulie
⁰⁷en n wienovver, n daarde hin wien, as n aangenoame geur veur de HEER.
⁰⁸As ie n rund kloarmoaken as brandovver of slachtovver, om n gelofte te wijden of as vree-ovver veur de HEER,
⁰⁹mout ie as meelovver drijtiende efa waaitenbloum bie rund aanbaiden aanmengd mit n haalf hin eulie.
¹⁰ En ie mouten der n wienovver biedoun van n haalve hin wien. Dat is n vuurovver, as aangenoame lucht veur de HEER.
¹¹ Zo mout t veur elke rund, veur elke ram, veur n schoaplaam of van boklaam.
¹² Veur ale ovvers dij ie brengen, mout ie dit aantal aanholden.
¹³ Elke geboren Isreliet mout dit zo doun as e n vuurovver brengt as aangenoame geur veur de HEER.
¹⁴ En n vremde dij loater vaast of tiedelk bie joe touholdt, mout net zo doun as ie as e n vuurovver aanbudt as aangenoame geur veur de HEER.
¹⁵ Wat haile gemainschop aangaait, veur joezulm en veur vremden dij bie joe touholden, geldt zulfde regel, t is n regel veur aaid. n Vremde is veur t aangezicht van de HEER net as ie.
¹⁶ Zulfde wet en zulfde regel geldt veur joe en veur vremden dij bie joe touholden.'”