Numeri 10
29 Mozes zee tegen Chobab, zeun van Midjaniet Reüel, Mozes zien schoonvoader: “Wie gonnen aan raais noar t stee tou doar de HEER van zegd het: 'Dat geef ik joe.' Goa mit ons mit, wie zellen joe goud behandeln, want de HEER het Israël t goie beloofd.”
30 Mor dij zee tegen hom: “Ik goa nait mit, omreden ik goa weer noar mien aigen laand doar mien femilie ook woont.”
31 Mor Mozes zee: “Loat ons toch nait in steek, ie waiten ja woar we in woestijn ons kaampement hènzetten mouten, ie binnen ons ja as n poar ekstroa ogen.
32 En as ie mit ons gonnen en de HEER let ons t goudgoan, zel t wezen dat wie joe goud behandeln.”
33 Dou raaisden ze drij doagen vèr van baarg van de HEER. Aark van t verbond mit de HEER trok drij doag laank veur heur aan om n rustploats veur heur op te zuiken.
34 Wolk van de HEER was bie heur dou ze overdag aan raais wazzen.
35 Aingoal as aark wieder trok, zee Mozes:
“In t èn, HEER, den worden joen vijanden oetnkander dreven
en joen hoaters gonnen veur joe op vlucht.”
36 En as aark stilstoan bleef, zee Mozes:
“Keer weerom, HEER, noar tiendoezend doezenden;
keer weerom noar Israël.”
