Jozua Tocht over Jordoan (3: 1-17)

Jozua 03

⁰¹Aanderdoagsmörgens wazzen Jozua en ale Isrelieten der vroug bie en raaisden òf van Sittim noar Jordaan tou. Doar bleven ze n poar nachten eer ze overstoken.
⁰²Drij doag noatied deden de laaiders de ronde deur t kaamp.
⁰³Zai zeden tegen t volk: “As ie zain dat priesters aark van t verbond van de HEER, joen God, op scholders pakken, mout ie opbreken en der achterheer goan.
⁰⁴Mor ie mouten der veur zörgen dat ter tussen joe en aark n ofstand blift van om en bie twijdoezend èl. Dichterbie kommen mag nait. Aark zel joe t pad wiezen, want ie binnen doar nog nooit langs kommen.”
⁰⁵En Jozua zee tegen t volk: “Ie mouten joe nou kloarmoaken. Zörg der veur dat ie goud hemmel en schoon binnen, omreden de HEER zel mörgen n groot wonder doun, doar ie apmoal slim van opkieken zellen.”

⁰⁶Tegen priesters zee Jozua: “Pak verbondsaark op scholders en goa veur t volk aan.” Dat deden ze.
⁰⁷Dou zee de HEER tegen Jozua: “Van vandoag òf aan zel ik zörgen dat t haile volk Israël joe n bult in reken het as laaider. Zai zellen waiten dat ik noast joe stoa net zo as destieds bie Mozes.
⁰⁸Zeg tegen priesters dij aark droagen: 'As ie bie Jordaan kommen binnen, mout ie in t wotter stoan blieven.'”
⁰⁹Tegen Isrelieten zee Jozua: “Kom hier heer en luster goud wat de HEER, joen God, zegd het wat of hai doun zel.
¹⁰ Den zel ie begriepen dat God dij leeft, bie joe is en dat ie der op aan kinnen dat hai Kanaänieten, Hethieten, Chiwwieten, Perizzieten, Girgasieten, Amorieten en Jebusieten verjoagen zel.
¹¹ Luster goud wat of ik joe zeg: Verbondsaark van de Heer van haile wereld, zel veur joe aan over Jordaan goan.
¹² Nou mout ie twaalf manlu oet stammen van Israël kaizen, van elke stam ain.
¹³ Zo gaauw as priesters dij aark droagen van t verbond van de HEER, dij Heer over haile wereld is, heur vouten in t wotter zetten, zel der gain stroom meer wezen en zel t wotter oet t noorden as n daam stoan blieven.”

¹⁴ Dou t volk tou t kaamp oet ging om over Jordaan te trekken, was t tied van inhoalen en den staait t wotter aaltied hoger as aans.
¹⁵ Priesters gingen veurop mit aark op scholder. Dou dij bie Jordaan kwammen en heur vouten doar in t wotter zetten, was t doan mit stromen.
¹⁶ n Hail èn wieder op, bie stad Adam stoef bie Saretan, kwam t wotter in t èn en bleef stoan as n daam. Der stroomde gain wotter meer noar Zoltzee, dij ook wel Dode Zee hait. Dou trok t volk over, tegen Jericho over.
¹⁷ Ondertied dat t volk over dreuge boom noar aanderkaant laip, bleven priesters mit aark doar op t dreuge stoan, tot ze der apmoal overhèn wazzen.