Jozua Zes vluchtsteden aanwezen (20: 1- 9)

Jozua 20

⁰¹Dou zee de HEER tegen Jozua:
⁰²“Isrelieten mouten nou dij vluchtsteden aanwiezen, doar ik t al eerder mit Mozes over had heb, dat dij dat tegen joe zeggen zol.
⁰³As ain bie ongelok n aander om t levent brocht het, nait mit opzet, den kin hai doarhèn vluchten. Man dij dood van zien femilielid ainlieks vreken mout, mag hom den niks doun.
⁰⁴Hai mout as de weerlicht moaken dat e in ain van dij vluchtsteden komt en doar bie stadspoort stoan goan en de oldsten van dij stad persies vertellen wat e doan het. Dij mouten hom permizzie geven om in heur stad te blieven en hom n stee geven doar e wonen kin.
⁰⁵As man dij zien femilie vreken mout, achter hom heer zit, maggen ze hom nait overlevern. Hai het t ja bie ongelok doan en nait omdat e hom nait lieden mog.
⁰⁶Den mout e doar wonen blieven totdat e veur t gericht west het. Nait eerder as dat ter n nije hogepriester is omdat de olde sturven is, mag e weeromgoan noar zien aigen stad en zien aigen hoes tou.”

⁰⁷Dou zunderden Isrelieten zès steden òf. Aan westkaant van Jordaan: Kedes in Galilea, in t heuvellaand van Naftali; Sichem in t baarglaand van Efraïm; en Kirjat-Arba , dat is n aander noam veur Hebron, in t baarglaand van Juda.
⁰⁸En aan aanderkaant Jordaan: Beser in woestijn op hoogvlakte, aan oostkaant van Jericho, in kontrainen van stam Ruben; en Ramot in Gilead in kontrainen van stam Gad; en Golan in kontrainen van stam Manasse.
⁰⁹Elke Isreliet en ook elke boetenlander dij in Israël woonde, kon noar ain van dizze steden vluchten as hai bie ongelok ain om t leven brocht haar. Den mog dij zien femilie hom niks doun zo laank as hai nait veur t gericht west haar.