Jozua Stammen dij aan aander kaant Jordoan wonen, goan weerom (22: 1- 9)

Jozua 22

⁰¹Jozua raip manlu van stammen Ruben en Gad en eerste haalfschaid van Manasse bie nkander.
⁰²Hai zee: “Ie hebben ales doan wat Mozes, de HEER zien knecht, zegd het en ook ales woar ik joe odder tou geven heb.
⁰³Zo laank as joen volk verlet om joe haar, heb ie heur hulpen. Ie hebben t aal krekt zo doan as de HEER, ons God, t wol.
⁰⁴De HEER haar d'aander stammen beloofd dat zai in vree wonen zollen in Kanaän. En nou het hai doan wat hai heur touzegd haar. Van dij gevolgen dat ie nou weer noar hoes tou kinnen, noar t laand dat Mozes joe al geven het, aan aanderkaant Jordaan.
⁰⁵Mor dou der denk om dat ie krekt doun wat Mozes, de HEER zien knecht, joe zegd het: heb laifde veur de HEER, joen God, dou van haarten geern wat hai zegd het en blief hom aaltied traauw.”
⁰⁶Dou nam Jozua ofschaaid van heur. Hai wènste heur de HEER zien zegen tou en zee, dat ze noar hoes goan konden. Votdoalek gingen ze op pad.
⁰⁷Manlu van haalve stam Manasse gingen ook mit. Mozes haar ja aan eerste haalfschaid laand geven aan oostkaant van Jordaan, in Basan. Jozua gaf aan aander haalfschaid n woonstee bie stammen aan westkaant van Jordaan.
⁰⁸Eer ze aan raais gingen zee Jozua tegen lu van Manasse: “Ie goan nou noar hoes mit n haile riekdom: n hail bult vij, zulver en gold, koper en iesder en n bult klaaieroazie. Ie hebben dat aalmoal joen vijanden ofwonnen. Dat mout ie dailen mit joen stamgenoten.”
⁰⁹Zo nammen dij twijenhaalve stam ofschaaid van aander Isrelieten in Silo, in t laand Kanaän. Zai gingen noar Gilead tou, heur aigen laand, dat zai veroverd haren, zo as Mozes in opdracht van de HEER zegd haar.