Jesaja t Vaaierde laid over knecht van de HEER (52:13-53:12)

Jesaja 52

¹³ Kiek, mien knecht zel der greep op kriegen,
aal meer in reken kommen, haile hoog verheven wezen.

¹⁴ Wat wazzen lu verbalderd,
tamtaaierd as e was en schonden,

mor naauw meer n mensk,

¹⁵ t verstand van volken staait ter bie stil
en keunenks stoan sproakeloos.

Ze zain wat heur nait verteld was,

besevven doar ze niks van vernomen haren.

⁰¹Wèl zol leuven wat wie heurd hebben?
Wèl kreeg oog veur macht van de HEER?

⁰²Hai schoot op as n luk stekje,
as n worrel in dreuge grond.

Aanzain het e nait,

gain pronk en pracht,

t aanzain nait weerd.

Van zien veurkommen ston gainent versteld.

⁰³Niks in reken, meden deur mensken,
n man dij wait van zaikte en verdrait,

aankeken mit hörns van ogen,

doar wie op deelzagen en niks in reken haren.

⁰⁴En toch: ons zaiktes het e overnomen,
ons lieden droagen.

n Aansloagen man veur ons,

deur God vernederd en tamtaaierd.

⁰⁵Om ons wandoaden is hai deurboord.
Om ons minne doaden is hai verdizzelwaaierd.

Hai kreeg de straf – wie de vree,

hai kreeg strips – wie beterschop.

⁰⁶As schoapen haar we ons verlopen,
wie gingen elk ons weegs.

Mor de HEER luit schuld van ons

deelkommen op hom.

⁰⁷Rinkjevield wer e, mor hai gaf hom deel,
dee mond nait open,

net as n schoap noar slachtbaank tou.

As n ooi, stom onder handen van schoapscheerders,

dee e mond nait open.

⁰⁸Oppakt wer e en veroordaild: t kostte hom de dood.
Wèl ston stil bie zien löt,

ofsneden as e wer oet t laand van leventegen,

doodsloagen om rebulie van mien volk?

⁰⁹Men dee hom n graf bie misdoadegers,
n grafstee maank rieke lu.

Toch haar e niks verkeerds doan,

nooit n onwoar woord zegd.

¹⁰ t Was de HEER zien wil hom te verdizzelwaaiern,
hom mit zaiktes te sloagen.

Toch het e zokzulm geven as ovver veur t kwoad.

Doarom mag e zien kindskinder zain en laank in leven blieven.

Joa, deur zien haand zel gruien en bluien aal wat de HEER wil.

¹¹ Noa aal zien lasten en lieden
krigt hai nou t licht te zain,

vol wieshaid zel e wezen.

Mien knecht zel zain loaten hou rechtveerdeg hai is veur altmoal:

hai pakt heur zunden op nek.

¹² Hai krigt zien paart, as aal dij grode lu,
en dailt t roofgoud mit dij t te zeggen hebben.

Aan dood het e zok over geven,

bie misdoadegers wer e rekend.

Mor t kwoad van n bult lu het hai op zok nomen,

tussenbaaident kwam e veur misdoadegers.