Jeremia Gainain kin tegen de HEER aan (10: 1-16)

Jeremia 10

⁰¹Israël, luster noar wat of de HEER tegen joe zegt:

⁰²Dit zegt de HEER:
Neem gebruken van aander volken nait over,

schrik nait van taikens aan lucht,

ook al worden aander volken der kèl van.

⁰³Wat zai doun het niks om hakken:
ze kappen in t bos blokken holt,

n vakman nemt ze mit baaidel onder handen,

⁰⁴hai moakt ze mooi mit gold en zulver,
spiekert boudel goud vaast mit hoamer

dat ze nait wibbeln.

⁰⁵Spouken in komkommertoen, dat binnen t:
proaten kinnen ze nait,

ze mouten droagen worden,

gain stap kinnen ze verzetten.

Wees der nait baang veur,

ze kinnen gain kwoad doun,

mor goud al net zo min.”

⁰⁶HEER, gainent is aan joe geliek,
ie allenneg binnen groot,

en groot is joen noam en macht.

⁰⁷Elk mout ontzag veur joe hebben,
Keunenk van de volken, dat komt joe ja tou.

Maank wieze lu van volken

en onder keunenkrieken is gainent aan joe geliek.

⁰⁸Altmoal mit nkander binnen ze dom en dwoas.
Heur ofgoden binnen van holt,

⁰⁹besloagen en bedoan mit bladzulver oet Tarsis
en gold oet Ufaz,

deur vaklu moakt,

bewaarkt deur goldsmid mit aigen handen.

Bekled mit blaauw en roodsangen:

altmoal t waark van kundege vaklu.

¹⁰ Wis en woar, de HEER is God,
hai is God dij leeft, keunenk veur aaid.

Veur zien kwoadens trilt eerde,

veur zien grammiedeghaid holdt gain volk t oet.”

¹¹ “Dit mout ie tegen heur zeggen:
Goden dij hemel en eerde nait moakt hebben,

zellen van eerde en hemel verswinnen.”

¹² Mor hai muik eerde deur zien kracht,
en het mit wieshaid wereld sticht,

mit kunde spraaidde hai hemel oet.

¹³ Zien dunder boldert mit geweld:
t wotter gobbelt tou lucht oet.

Hai let wolken opkommen

van oetènnen van wereld.

As t regent, smeedt hai weerlichten,

hoalt wind veurndag oet schuren.

¹⁴ Mensken stoan riddersloagen,
ze kinnen der mit verstand nait bie.

Goldsmid schoamt zok veur zien beelden,

wat e goten het is kloar bedrog,

der zit gain spiertje leven in,

¹⁵ t binnen dingen van niks, veur spot stoan ze.
As t op ofreken aankomt, worden ze verdoan.

¹⁶ God van Jakob is nait net as zai,
hai is vörmer van ales

en Israël is zienent.

Zien noam is HEER van de machten.