Handelingen van apostels 08
26 n Engel van de Heer zee tegen Filippus: “Kom es! Goa op raais noar t zuden, weg op dij van Jeruzalem noar Gaza lopt.” t Is doar n verloaten wereld.
27 Hai kwam in t èn en ging aan raais. Loat e doar nou n man trevven oet Ethiopië, n hoge functionoares van de kandake, keunegin van Ethiopië. Hai regelde aal heur geldzoaken. Dij haar noar Jeruzalem tou west om te beden en nou was e op weeromraais.
28 Hai zat op zien woagen profeet Jesaja te lezen.
29 Dou zee Gaist tegen Filippus: “Goa noar dij woagen tou en toal hom ais aan!”
30 Filippus laip ter gaauw hèn en heurde hom profeet Jesaja lezen. “Begriep ie wel wat of ie doar lezen?” vruig e hom.
31 “Hou zol k,” zee man, “as gainain mie wegwies moakt?” Dou nuigde hai Filippus om in te stappen en noast hom zitten te goan.
32 Nou was dit t gedailte oet de Schrift dat e leesde:
“As n schoap wer e noar slachtbaank brocht,
as n laam dij gain kik geft as e schoren wordt,
zo dee e gain mond open.
33 Ainmoal ofzet mos e veur t recht.
Zien noazoaten: wèl zel t ter over hebben?
Hai wordt ja van kaant moakt!”f + Dit vers is zo stoer, dat we gain wizzeghaid hebben wat of ter bedould wordt.f*
34 Noar aanlaaiden doarvan zee koamerheer tegen Filippus: “Mag k joe ais vroagen: over wèl het profeet t hier, over zokzulm of over n aander?”
35 Dou kwam Filippus lös. Hai ging oet van t schriftgedailte dat man lezen haar en verkundegde hom t grode nijs over Jezus.
36 Onderwegens kwammen ze bie n wotter. “Kiek, hier is wotter,” zee koamerheer, “wat is ter tegen dat ik deupt wor?”f + Vers 37 komt mor in n haile poar handschriften veur.f*
38 Dou luit e woagen stilholden, en baaident, Filippus en koamerheer, gingen in t wotter en hai deupte hom.
39 Dou ze tou t wotter oetkommen wazzen, nam de Heer zien Gaist Filippus inains vot: koamerheer zag hom nait meer. Mor gliekegoud raaisde hai blied wieder.
40 Filippus kwam weer veurndag in Azotus. Op deurraais brochde hai bliede bosschop aan ale steden, net zo laank dat e in Caesarea kwam.
