Handelingen van apostels 02
14 Dou ging Petrus stoan mit de elm, zette zien stem oet en zee: “Jeuden en ale inwoners van Jeruzalem! Wat of ik joe nou zeg, mout ie waiten en goud in oren knuppen.
15 Dizze mensken binnen nait doen zo as ie mainen. t Is ja nog mor net negen uur smörgens!
16 Nee, hier gebeurt wat of profeet Joël zegd het:
17 'Noa verloop van tied, zegt God,
zel ik wat van mien Gaist oetgaiten over aal wat leeft.
Joen jonges en wichter zellen profetaaiern.
Joen jonkvolk zel gezichten zain.
Joen olden zellen dreumen.
18 Joa, alderdeegs over mien knechten en maaiden
zel ik in dij doagen wat van mien Gaist oetgaiten
dat ze profetaaiern.
19 Ik zel hoog aan hemel dingen gebeuren loaten
om baang van te worden
en onder op wereld dingen
dij nait veul gouds beduden:
bloud en vuur en kwaalm.
20 Zun zel duusternis worden en moan bloud,
veurdat de Heer as rechter komt, groot en stroalend.
21 Den zel t gebeuren dat elkenain
dij de Heer zien noam aanropt,
red worden zel.'
22 Isrelieten, luster noar dizze woorden. Van Jezus van Nazaret was dudelk worden dat e deur God noar joe toustuurd was. Zokke machtege doaden, wonders en taikens haar God deur hom maank joe doan. Dat wait ie zulm ook wel.
23 Toch heb ie dizze man, en dat haar God in zien plan en veurkennes zo bepoald, oetleverd en ombrocht deur hom aan t kruus te sloagen. Doar heb ie haaidens veur in aarm nomen.
24 Mor God luit hom weer oet zien graf opstoan. Hai muik n èn aan dood zien weeën; dij kon hom ja nait meer vastholden.
25 David zegt toch van hom:
'Ik haar de Heer altied veur ogen.
Hai lopt ja aan mien rechterzied
dat ik t op n bainen hol.
26 Doarom wer ik zo blied vanbinnen.
Ik kon mien bliedschop nait veur mie holden.
Aal hou swak of ik bin,
ik zel n woonstee vinden
doar of veuroetzichten goud binnen.
27 Ie zellen ja mien levent nait aan dood overloaten,
en man, dij ie veur joe ofzunderd hebben,
t nait aandoun dat e vergaait.
28 Ie hebben mie oetdud woar of ik langs mout
om t levent te vinden.
Ie zellen mie deurhèn blied moaken
deur zulm bie mie te blieven.'
29 Bruiers, ik mag tegen joe van oartsvoader David gerust zeggen dat e sturven en begroaven is. Zien graf is ja bie ons aan vandoag tou.
30 Hai was n profeet en wos dat God hom n aid sworen haar: hai zol ain dij van hom ofstamde op zien troon zetten.
31 Zo het e in toukomst zain en t over Christus zien opstanden had dou e zee dat hai nait aan dood overloaten worden zol en nait omkommen.
32 Nou, dizze Jezus het God opstoan loaten. Doar bin wie mitnkander getuge van.
33 Nou is e verheven en zit aan God zien rechterhaand. Van zien Voader het e hillege Gaist kregen dij hom touzegd was. Zo het e, wat of ie hier zain en heuren, oetgoten.
34 Nait David is ja noar hemel goan. Hai zegt ja zulm:
35 'De Heer het tegen mien Heer zegd: Goa zitten aan mien rechterzied. Net zo laank dat ik joen vijanden deellegd heb as n voutbaank veur joen vouten.'
36 t Haile volk Israël mout vervaast waiten dat God hom as Heer en as Christus aansteld het. Dij aigenste Jezus, dij ie aan t kruus sloagen hebben.”
37 Dou ze dat heurden ging heur t deur ales hèn. Ze zeden tegen Petrus en aal aander apostels: “Wat mout we doun, bruiers?”
38 Petrus zee tegen heur: “Bekeer joe! Loat joe aalmoal deupen in Jezus Christus zien noam, dat joen zunden vergeven worden. Den krieg ie hillege Gaist.
39 t Is joe ja touzegd en joen kinder en ale mensken in hail de wiede wereld, dij de Heer, ons God, bie zok roupen zel.”
40 Mit nog aander woorden meer beswoor e heur en raip heur der tou op: “Loat joe toch redden oet dizze minne wereld!”
41 Dij zien woorden aannammen, luiten zok deupen. Op dij dag kwammen der zowat drijdoezend man bie.
42 Ze legden zok in eerns op apostels heur leer tou, bleven traauw aan heur gemainschop, dailden t brood en beedden mitnkander.
43 Elkenain kreeg ontzag. Apostels deden ja veul wonders en taikens.
