Handelingen van apostels n Verlamde man beder moakt (3: 1-10)

Handelingen van apostels 03

⁰¹Petrus en Johannes wazzen onderwegens noar tempel, tegen drij uur smirregs, tied van t gebed.
⁰²Nou was doar n man dij lam was van zien geboorte òf aan, dat dij mos droagen worden. Aal doage zetten ze hom hèn bie tempelpoort, dij Mooie Poort nuimd wer. Den kon e aan dijent, dij tou tempel in gingen, vroagen om hom wat te geven.
⁰³Dou e zag dat Petrus en Johannes in tempel goan wollen, vruig e heur ook om wat.
⁰⁴Petrus keek hom stief aan en Johannes net zo. Hai zee: “Kiek ons es aan!”
⁰⁵Hai huil zien ogen nait van heur òf, omreden hai verwachtte wat van heur te kriegen.
⁰⁶Mor Petrus zee: “Zulver en gold heb ik nait. Mor wat of ik wel heb, dat geef ik die. In noam van Jezus Christus van Nazaret: goa stoan en loop!”
⁰⁷Hai kreeg hom bie rechterhaand en hulp hom in t èn. Op slag werden zien vouten en enkels steveg.
⁰⁸Hai sprong op, ging stoan en laip hènneweer. Dou ging e mit heur in tempel en laip mor en daansde en prees God.
⁰⁹Aal t volk zag hom lopen en God priezen.
¹⁰ Ze konnen hom: dat was ja aigenste man dij bie Mooie Poort van tempel zeten haar te bedeln! Ze verboasden zok en wazzen glad verhilderd over wat of ter mit hom gebeurd was.