Exodus n Altoar veur braandovvers (27: 1- 8)

Exodus 27

⁰¹Ie mouten ook n altoar van acaciaholt moaken, n vaaierkantege altoarblok van vief bie vief èl en drij èl hoog.
⁰²Op aal vaaier houken mout ie hoorns moaken. Dij hoorns mouten ain gehail wezen mit t altoar en ie mouten ze mit brons besloagen.
⁰³Wieder mout ie potten veur d'aask moaken, schoppen en schuddels, vörken en vuurpotten, ales van brons.
⁰⁴Om t altoar tou mout ie n hek van brons moaken mit op aal vaaier houken n ring.
⁰⁵Dat hekwaark mout op onderste raand van t altoarblok vastzet worden en haalf zo hoog wezen as t altoar zulm.
⁰⁶Den mout ie droagbomen van acaciaholt veur t altoar moaken en dij mit brons besloagen.
⁰⁷Veur t vervoaren van t altoar mout ie dij droagbomen aan weerszieden deur ringen hèn steken.
⁰⁸t Altoar mout van kistholt in nkander zet worden en vanbinnen hòl blieven, net zo as ik die op baarg zain loaten heb.