Exodus Mozes zien geboorte (2: 1-10)

Exodus 02

⁰¹n Man oet stam van Levi traauwde mit n vraauw oet dat aigenste geslacht.
⁰²Zai ruik in verwachten en kreeg n zeun. Dou zai zag, hou n nuver jonkje of t was, huil ze hom bezied; wel drij moand laank.
⁰³Laanger was ja nait vertraauwd. Zai kreeg n raaiten körfke en smeerde dij dicht mit pik. Zai vlijde t kind derin en zette t körfke tussen t raait aan kaant van de Nijl.
⁰⁴t Jonkje zien zuster ging n èndje wieder stoan, omreden zai wol waiten hou t mit hom oflopen zol.

⁰⁵n Zetje loater kwam farao zien dochter bie de Nijl om te boaden. Heur hofdoames laipen in tied op waal hènneweer. Inains wer ze t körfke in t raait gewoar en zai stuurde ain van heur hofdoames der op òf om t op te hoalen.
⁰⁶Dou zai t openmuik en t jonkje zag dat zo reerde, begrootte heur dat slim. Vol meedlieden raip ze: “Dat is vervaast n Hebreeuws kind.”
⁰⁷t Jonkje zien zuster kwam der op òf en vruig: “Zel ik n Hebreeuwse vraauw veur joe zuiken?”
⁰⁸“Tou mor,” zee ze. Votdoalek ging t wichtje heur moeke hoalen.
⁰⁹Farao zien dochter gaf heur t kind mit: “Geef ie t veur mie bòrst en zörg der goud veur, k zel t goud mit joe moaken.” Moeke nam t kind mit en verzörgde hom.
¹⁰ Dou jong groot genog was, brochde ze hom weerom noar farao zien dochter. Dij nam hom aan as heur zeun en nuimde hom Mozes. “Ik heb hom ja tou t wotter oethoald,” zee ze.