Exodus n Ovvertoavel (25:23-30)

Exodus 25

²³ Wieder mout ie n toavel van acaciaholt moaken, twij èl laank, ain èl braid en mit n högte van anderhaalf èl.
²⁴ Dij mout ie mit zuver gold besloagen en der n golden liest rondomtou moaken.
²⁵ Boetendes mout ie n raand van n handbraid om toavel tou moaken, ook weer mit n golden liest.
²⁶ Der mouten ook vaaier golden ringen aan vastmoakt worden, op aal vaaier houken bie de poten.
²⁷ Dij ringen mouten zo aan toavel vastmoakt worden dat droagbomen doar deurhènstoken worden kinnen om doar toavel mit op te tillen.
²⁸ Dij droagbomen mout ie ook weer van acaciaholt moaken en mit gold besloagen.
²⁹ Wieder mout ie veur t ovvern schuddels en schoalen, kannen en kommen moaken, ales van zuver gold.
³⁰ En op dij toavel mout ie hailtied weer broden veur mie hènleggen.