Ester Poal hènzet veur Mordekai (5: 9-15)

Ester 05

⁰⁹Blied en mit goud zin ging Haman dij dag vot, mor dou e in poort van keunenk zag dat Mordechai nait stoan ging en alderdeegs nait veur hom van stee kwam, wer e vergrèld.
¹⁰ Mor hai bedapperde zok en ging noar hoes tou. Hai luit zien vrunden en zien vraauw Zeres bie zok kommen.
¹¹ Haman stokte heur oet hou riek of hai was, houveul zeuns of hai haar, mit houveul eer hai deur keunenk overloaden was en hou of hai verhoogd was boven vorsten en dainders van keunenk.
¹² “Boetendes,” zee Haman, “het keunegin Ester behaalve keunenk, mie allain veur t feestmoal nuigd dat zai holden het, en veur mörgen het zai mie weer bie zok nuigd, soamen mit keunenk.
¹³ Mor wat heb ik doar aan zo laank as ik dij Jeud Mordechai in poort van keunenk zitten zai?”
¹⁴ Zien vraauw Zeres en aal zien vrunden zeden tegen hom: “Loat n poal moaken van fiefteg èl hoog en zeg den mörgenvroug tegen keunenk, dat men zol Mordechai doar op spietsen mouten. Noa tied kinstoe blied en wel mit keunenk noar t feestmoal goan.” Dat leek Haman goud tou en hai luit n poal kloarmoaken.