Eerste braif aan Timoteüs n Aanzeggen aan dwoalleroars (1: 3-11)

Eerste braif aan Timoteüs 01

⁰³(Wat of ik die nou schrief is) netgliek aan opdracht dij ik die bie mien vertrek noar Macedonië gaf: doe zolst in Efeze blieven om doar bepoalde lu aan te zeggen dat ze gain ofwiekende leer brengen maggen
⁰⁴of zok opholden mit mythes en mit t oetzuiken van stambomen doar je in vertoezen. Dat geft ja mor hakketakkerijen en is nait bevörderliek veur wereldodder dij God beoogt en dij op t geleuf baauwd is.
⁰⁵Mit dizze aanzeggen beoog ik laifde; laifde dij opkomt oet n zuver haart, n goud gewaiten en n eerlieks geleuf.
⁰⁶Deur dat doul oet t oog te verlaizen, binnen paardie lu ofdwoald en te laande kommen in proat dij niks om hakken het,
⁰⁷deurdat ze zok as leroars in wet aanstellen, zunder dat ze deurhebben wat of ze zeggen of woar ze zokke stellege oetsproaken over doun.
⁰⁸Wie waiten wel: wet is goud, mor den mout je der wel wetteg mit omgoan
⁰⁹en der op verdocht wezen dat dij wet ter nait is veur n rechtveerdege, mor veur mensken dij van gain wet of onderdoaneghaid waiten willen. Wet is veur goddelozen en zundoars, veur schobbejakken en lu veur wèl of niks haaileg is, veur mensken dij heur voader of mouder of n aander mensk van kaant moaken,
¹⁰ veur kerels dij klongeln of dij t mit manlu doun, veur sloavenjoagers, leugenbaisten of dij n vaalze aid ofleggen en wat of wieder lienrecht tegen gezonde leer ingaait.
¹¹ Dizze leer is ofstemd op dij heerleke bliede bosschop van ons gelokzoalege God, bosschop dij mie aanvertraauwd is.