2 Samuël 03
22 Abner was nog mor net goud en wel oet Hebron ofraaisd, of doar kwam Joäb mit n koppel soldoaten van David weerom van n struuntocht, ze haren n bult roofgoud bie zok.
23 Doalek wer hom verteld dat Abner bie keunenk west haar en dat dij, zunder hom n strobraid in weeg te leggen, hom goan loaten haar.
24 Joäb ging votdoalek noar keunenk tou en zee: “Wat heb ie nou in vredesnoam doan? Kiek toch ais aan, nou het Abner bie joe west en ie hebben hom zo mor lopen loaten!
25 Heb ie Abner den nait deur? Hai is ja allenneg mor bie joe kommen om joe te beloazern en om joen doun en loaten aan wait te kommen, en gewoar te worden wat joen plannen mit t oorlogvoeren binnen.”
26 Dou ging Joäb vot en stuurde bodes achter Abner aan. Dij huilen hom in bie wèl van Sira en brochten hom, zo t haitte, weerom noar David. Mor David wos doar niks van.
27 Dou Abner weerom was in Hebron nam Joäb hom even apaart in poort: hai wol zogenoamd onder vaaier ogen wat mit hom beproaten. Hier stook hai hom dood mit n steek in t lief, as vroak veur dood van zien bruier Asaël.
28 Dou David dit eefkes loater heurde zee e: “De HEER is getuge dat ik as mensk en as keunenk haildaal gain schuld heb aan t bloud van Abner, zeun van Ner. Nou nait en nooit nait!
29 Wat mie aangaait: dit zel Joäb en zien haile femilie nog maal opbreken, zodat doar aingoal ain is mit n bloudzaikte of schurft, of ain dij op krukken lopt of doodkomt deur t sweerd, of honger lidt.”
30 Joäb en zien bruier Abisai hebben Abner ja vermoord omreden hai heur bruier Asaël doodmoakt het in t gevecht bie Gibeon.
31 David zee tegen Joäb en tegen aal t volk dat bie hom was: “Riet joen klaaier stokkend, dou aaltemoal n raauwklaid aan en treur om Abner.” Keunenk laip zulm achter liekboar aan.
32 Dou begruiven ze Abner in Hebron. Bie zien graf begunde keunenk David haardop te reren en ale aandern dij der bie wazzen ook.
33 Dou zong keunenk dit kloaglaid over Abner:
“Mos Abner aan zien èn kommen as n misdoadeger?
34 Nooit binnen dien handen vastbonden,
nooit zatten dien vouten in t blok.
Doe bist omkommen deur moordenoarshanden.”
Dou jammerde t volk nog haarder om Abner.
35 Aal dij doar wazzen, wollen David dij dag eten tou, mor hai swoor: “God mag mie k wait nait wat doun as ik veurdat zun ondergaait aan eten kom.”
36 Dit sluig in en zai vonden t hail mooi en goud. Traauwens, zai vonden aal wat keunenk dee, mooi en goud.
37 Dij dag begrepen aal dij mensken en ook ale Isrelieten, dat keunenk David niks mit Abner zien dood te moaken haar.
38 Ook zee keunenk tegen zien vertraauwde bedaindes: “Heb ie wel in de goaten dat Israël vandoag n grode en edele laaider kwiet worden is?
39 Mor ook al bin ik aansteld as keunenk, nou kin ik dij bikkelhaarde kerels, dij zeuns van Seruja, nog nait boas. De HEER mag de misdoadeger doun noardat hai verdaind het.”
