2 Keunenks Achazja, keunenk van Juda (8:25-29)

2 Keunenks 08

²⁵ In t twaalfde joar dat keunenk Joram, Achab zien zeun, over Israël regaaierde, wer Achazja, keunenk Joram van Juda zien zeun, keunenk over Juda.
²⁶ Twijentwinneg joar was e, dou e keunenk wer. Hai regaaierde ain joar in Jeruzalem. Zien moeke was Atalja, n dochter van keunenk Omri van Israël.
²⁷ Hai ging t aigenste pad op as t hoes van keunenk Achab en dee wat min is in ogen van de HEER, krekt as t hoes van keunenk Achab. Hai haar ook ja ain traauwd van Achab zien femilie.

²⁸ Achazja ging mit keunenk Joram, Achab zien zeun, mit noar Ramot in Gilead om te vechten tegen keunenk Hazaël van Aram. Mor Arameeërs kregen Joram goud te pakken,
²⁹ dat dij ging weerom noar Israël om wonden betern te loaten dij Arameeërs hom toubrocht haren dou e bie Ramot aan t vechten was tegen keunenk Hazaël van Aram. Achazja, Joram zien zeun, keunenk van Juda, ging noar Jizreël op veziede bie zaike keunenk Joram van Israël.