1 Samuël Moord op priesters van Nob (22: 6-23)

1 Samuël 22

⁰⁶Saul wer dat gewoar, want David en zien manlu laipen in de goaten. Saul zat in Gibea, onder n tamarisk, op n högte. Hai haar zien speer in haand en aal zien knechten stonden bie hom.
⁰⁷Dou zee Saul tegen zien knechten: “Benjaminieten, luster! Denk ie meschain dat zeun van Isaï joe laand en droevetoenen geven zel, of joe aalmoal as overstes over doezend en honderd man aanstellen?
⁰⁸Ie hebben ja aalmoal tegen mie soamenspand en gainain het mie der van verteld dou mien zeun n verbond sloot mit zeun van Isaï. Gainain van joe dij zok aan mie steurt. Gainain van joe het verteld dat mien knecht deur mien zeun opsteukeld is om listen en loagen tegen mie te bruken.”
⁰⁹Doëg oet Edom, dij bie Saul zien knechten ston, zee: “k Heb zain dat zeun van Isaï in Nob kwam bie Achimelech, Achitub zien zeun.
¹⁰ Dij het veur hom de HEER om road vroagd en hom eten geven veur onderwegens. Hai het hom t sweerd van Filistijn Goliat mitdoan.”
¹¹ Dou luit keunenk priester Achimelech, Achitub zien zeun, roupen, mit zien haile femilie, priesters van Nob. Ze kwammen aalmoal bie keunenk.
¹² “Luster noar mie, zeun van Achitub,” zee Saul. “Joa, mien heer,” antwoordde Achitub.
¹³ “Woarom,” vruig Saul, “heb ie mit zeun van Isaï tegen mie soamenspand mit aan hom brood en n sweerd te geven, en heb ie God veur hom om road vroagd, van dij gevolgen dat e nou tegen mie in opstand kommen is?”
¹⁴ “Mor keunenk,” antwoordde Achimelech, “wèl van aal joen knechten kin je zo vertraauwen as David? Hai is ja keunenk zien schoonzeun, lid van joen liefwacht, hoog in aanzain in joen hoes.
¹⁵ Docht ie dat dit eerste moal west het dat ik God veur hom om road vroagd heb? Wizzenzeker nait! Loat keunenk zien knecht, joa, mien haile femilie, gain schuld geven. Joen knecht het ja haildaal niks van dit ales ofwaiten.”
¹⁶ Mor keunenk zee: “Ie zellen staarven, Achimelech! Ie, en joen haile femilie!”
¹⁷ Keunenk bestelde soldoaten van garde dij bie hom stonden: “Kom hier, sloag priesters van de HEER dood, want ze stoan ook aan David zien kaant. Ze wozzen der van dat David der vandeur was, zunder dat ze mie t zegd hebben.” Mor keunenk zien knechten wollen gain haand oetsteken om priesters van de HEER dood te moaken.
¹⁸ “Kom hier, en steek dij priesters dood,” zee keunenk dou tegen Doëg. En Doëg oet Edom, dee dat. Hai brochde dij dag vieventachteg man om, dij linnen rok druigen.
¹⁹ Priesterstad Nob sluig hai ook mit t sweerd, manvolk en vraauwlu, kinder en potjes, koien, ezels en schoapen, brochde hai om.

²⁰ Ain zeun van Achimelech, Achitub zien zeun, dij Abjatar haitte, kon votkommen. Hai vluchtte noar David tou.
²¹ Dou Abjatar tegen David zee dat Saul priesters van de HEER doodmoakt haar,
²² zee David tegen hom: “Omdat Doëg oet Edom doar touhuil, wos ik dou al wel dat hai t vaast tegen Saul zeggen zol. t Komt deur mie dat joen haile femilie dood is.
²³ Blief bie mie en wees nait benaauwd. Want dij t op mie veurzain het, het t ook op joe veurzain. Bie mie kin joe niks gebeuren.”