1 Samuël Filistijnen versloagen bie Mispa (7: 2-17)

1 Samuël 07

⁰²Van dag òf dat aark in Kirjat-Jearim ston, gingen der wel twinneg joar verbie en aal dij tied bleef hail Israël bie God kloagen.
⁰³Doarom zee Samuël tegen ale Isrelieten: “As ie joen haile haart weer noar de HEER toukeren, dou vremde goden den bie joe vot. Astartes ook. Richt joen haart noar de HEER en dain enkeld hom. Den zel hai joe verlözzen van Filistijnen.”
⁰⁴Isrelieten deden Baäls en Astartes vot en ze dainden allain de HEER.
⁰⁵Dou zee Samuël: “Loat ale Isrelieten in Mispa bie nkander kommen. Den zel ik veur joe beden tou de HEER.”
⁰⁶Dou ze bie nkander wazzen in Mispa, putten ze wotter en dat goten ze oet veur de HEER. Zai vastten dij dag en ze zeden doar: “Wie hebben tegen de HEER zundegd.” En Samuël richtte Israël in Mispa.

⁰⁷Filistijnen heurden dat Isrelieten in Mispa bie nkander kommen wazzen en doarom trokken stadsvorsten van Filistijnen op tegen Israël. Isrelieten heurden dat en ze werden benaauwd veur Filistijnen.
⁰⁸Ze zeden tegen Samuël: “Hol nait op mit roupen noar de HEER, ons God, dat hai ons verlöst oet Filistijnen heur macht.”
⁰⁹Dou kreeg Samuël n zoeglaam. Dat ovverde hai in zien gehail as brandovver aan de HEER. En Samuël raip tou de HEER veur Israël en de HEER antwoordde hom.
¹⁰ Samuël was nog dounde mit t brandovver, dou Filistijnen der aankwammen om mit Israël te vechten. Mor de HEER dunderde dij dag mit n geweldege stem tegen Filistijnen. Hai luit heur zo aldernoarst schrikken dat ze leden neerloag tegen Israël.
¹¹ Isrelieten gingen oet Mispa Filistijnen achternoa en ze versluigen heur tot verbie Bet-Kar.
¹² Samuël kreeg n stain, zette dij tussen Mispa en Sen deel en nuimde dij Eben-Haëzer. “Want,” zee e, “aan hier tou het de HEER ons hulpen.”
¹³ Filistijnen werden versloagen en ze kwammen nait weer in t laand van Israël. De HEER was tegen Filistijnen zo laank as Samuël leefde.
¹⁴ Steden dij Filistijnen op Israël veroverd haren, kwammen weer aan Israël, van Ekron òf aan Gat tou. Ook t laand dat ter bie heurde wer deur Israël van Filistijnen bevrijd. Ook tussen Israël en Amorieten was ter vree.

¹⁵ Samuël richtte Israël zien haile levent.
¹⁶ Joar op joar dee e de ronde van Betel noar Gilgal en Mispa. In aal dij ploatsen sprak e recht over Israël.
¹⁷ Mor aaltied ging e weerom noar Rama tou. Want doar was zien hoes en doar richtte hai Israël. Hai baauwde doar n altoar veur de HEER.