1 Samuël Verbond tussen Doavid en Jonatan (18: 1-15)

1 Samuël 18

⁰¹Mit dat David opholden haar te proaten tegen Saul, ging Jonatan zien haart noar David oet. Hai mog hom net zo geern lieden as zokzulm.
⁰²Saul nam hom dij dag mit en gaf hom gain permizzie om noar t hoes van zien voader weerom te goan.
⁰³Jonatan sloot n verbond mit David, omreden hai mog hom net zo geern lieden as zokzulm.
⁰⁴Hai trok zien aigen mantel dij e aan haar, oet en gaf dij aan David. Zien woapenrok ook, en alderdeegs zien sweerd, zien boog en zien raim.

⁰⁵David trok oet om te strieden en woar Saul hom ook hènstuurde, t ging hom goud òf. Doarom stelde Saul hom aan over zien kriegslu. Aal t volk, en Saul zien knechten ook, wazzen t ter mit ains.

⁰⁶Dou ze ais thoeskwammen, David kwam weerom noa n overwinnen op Filistijnen, kwammen vraauwlu oet ale steden van Israël keunenk Saul zingend en daanzend in muit mit rinkelbèllen en triangels, joechaaiend van bliedschop.
⁰⁷Vraauwlu zongen:
“Saul het zien doezenden versloagen,

David zien tiendoezenden!”

⁰⁸Dit was Saul hail min noar t zin en hai wer vergrèld: “Zai hebben David tiendoezenden geven en mie mor doezenden. Dommit is t keunenkschop ook nog veur hom.”
⁰⁹Van dij dag òf aan, huil Saul David in de goaten.

¹⁰ Aanderdoagsmörgens kwam kwoaie gaist van God over Saul. Hai ging in hoes te keer as n wilde. David tokkelde as elke dag op snoaren. Saul haar zien speer in haand.
¹¹ “Ik zel David aan muur spietsen!” raip Saul. Hai gooide speer, mor aan twij moal tou kon David hom ontwieken.
¹² Dou begunde Saul benaauwd veur David te worden, omdat de HEER hom verloaten haar en mit David was.
¹³ Doarom stuurde Saul David bie zok vandoan en muik hom overste over doezend man. Hai ging veur t kriegsvolk aan as e oettrok en as e weeromkwam.
¹⁴ t Ging David goud bie aal dat e dee, want de HEER was mit hom.
¹⁵ Dou Saul zag dat t hom aaltied mitlaip, wer e benaauwd veur hom.