1 Samuël Doavid in Keïla (23: 1-13)

1 Samuël 23

⁰¹t Wer David zegd: “Filistijnen valen Keïla aan en roven dörssteeën leeg.”
⁰²David vruig aan de HEER: “Zel k doar hèngoan en dij Filistijnen versloagen?” “Goa der mor hèn, versloag Filistijnen en verlös Keïla,” zee de HEER.
⁰³Mor manlu van David zeden: “Hier in Juda heb we t al benaauwd, houveul slimmer zel t wel wezen as wie noar Keïla tou goan op slagordes van Filistijnen òf.”
⁰⁴Doarom vruig David nog ais aan de HEER, en de HEER antwoordde: “Goa noar Keïla, want ik zel Filistijnen in joen macht geven.”
⁰⁵David en zien manlu gingen noar Keïla tou. Hai vocht mit Filistijnen, dreef heur vij vot en brochde heur n dikke neerloag tou. David verlöste inwoners van Keïla.
⁰⁶Dou Abjatar, Achimelech zien zeun, noar David bie Keïla tou vluchtte, haar e t priesterklaid bie zok.

⁰⁷Saul wer gewoar dat David in Keïla kommen was en hai zee: “God het hom in mien macht geven, omreden hai het zokzulm opsloten mit dat hai tou n stad mit deuren en grondels ingoan is.”
⁰⁸Hai raip aal t volk noar Keïla om te strieden en David en zien manlu in te sloeten.
⁰⁹Dou David heurde dat Saul kwoad tegen hom in t zin haar, zee e tegen priester Abjatar: “Breng t priesterklaid hier.”
¹⁰ “HEER, God van Israël,” zee David, “joen knecht is der van overtuugd dat Saul t in t zin het om noar Keïla te kommen. En dat e om mie, onhaail brengen wil over dizze stad.
¹¹ Zellen börgers van Keïla mie aan hom oetlevern? Zel Saul hier heer kommen zo as joen knecht heurd het? HEER, God van Israël, geef joen knecht toch beschaaid.” “Joa, antwoordde de HEER, “hai zel kommen!”
¹² “Zellen börgers van Keïla mie en mien manlu oetlevern aan Saul?” vruig David. “Joa,” antwoordde de HEER, “zai zellen joe oetlevern!”
¹³ Votdoalek muiken David en zien manlu, zo'n zèshonderd man, zok op. Ze gingen oet Keïla vandoan en begunden doar om te swinnen. Saul wer gewoar, dat David oet Keïla ontkommen was en hai zag van ondernemen òf.