001Pries de HEER!
Pries de HEER, want hai is goud,
joa, aiweg geldt zien gunst.
002Wèl kin machtege doaden van de HEER bekendmoaken,
wèl kin zien lof volsloagen heuren loaten?
003Gelokkeg binnen dijent dij t recht bewoaren,
en aaltied gerechteghaid doun.
004Denk aan mie, o HEER, in joen laifde veur joen volk,
kom mie in muit mit joen haail,
005dat ik t gelok te zain krieg van lu, oetkozen deur joe,
dat ik blied bin over bliedschop van joen volk,
dat ik mie gelokkeg priezen kin, soamen mit joen aarfdail.
006Zundegd heb wie, net as ons veurvoaders,
onrecht heb wie doan, verkeerd heb wie west.
007Ons veurvoaders in Egypte
sluigen gain acht op joen wonderdoaden,
ze dochten nait aan joen rieke traauw
en wazzen rebels bie zee, bie Raaitzee.
008Mor hai redde heur omwille van zien noam,
om zien machtege doaden bekend te moaken.
009Hai gaf Raaitzee n inzeggen en dij vuil dreug,
hai luit heur over boom van zee goan of was t woestijn.
010 Hai hulp heur oet haand van hoater,
verlöste heur oet haand van vijand.
011 t Wotter bedekte heur tegenstanders,
der bleef gainain van heur over.
012 Dou vertraauwden ze zien woorden
en zongen ze zien lof,
013 mor al gaauw wazzen ze zien doaden vergeten,
ze wachtten zien road nait òf.
014 Ze werden aalbegereg in woestijn,
wollen God in wildernis oetperbaaiern.
015 Hai gaf heur woar ze om vroagd haren,
tot ze der zaik van werden.
016 Ze werden ofgunsteg op Mozes in t legerkaamp,
op Aäron, haailege van de HEER.
017 Dou brook eerde open en verslon Datan,
en bedekte Abiram zien bende.
018 Vuur vlamde op maank heur aanhang,
vlammen verteerden dij goddelozen.
019 Ze muiken n bolkaalf bie Horeb
en gingen op knijen veur dat goten beeld.
020 Heur Glorie gavven ze vot
veur n beeld van n baist dat gras vret.
021 Ze vergaten God, heur redder,
dij grode dingen doan haar in Egypte,
022 wonderdoaden in t laand van Cham,
geduchte doaden bie Raaitzee.
023 Hai zol heur al oetreuden,
as Mozes, deur hom oetkozen, der nait west haar,
dij kwam veur heur op
om Gods grammiedeghaid òf te keren.
024 Ze wollen nait waiten van dat goie laand,
vertraauwden nait wat hai zee.
025 Ze zatten mor te vrantern in heur tènten,
en heurden nait noar stem van de HEER.
026 Dou swoor hai mit vingers omhoog,
dat hai zol heur vergraimen in woestijn,
027 heur noazoaten verspraaiden onder volken,
heur oetstreuen over landen.
028 Dou ze Baäl-Peor achternoalaipen
en dodenovvers atten,
029 hom zeer deden deur heur doaden,
brook der n ploag bie heur oet.
030 Mor Pinechas ston op en kwam tussenbaaident
en ploag huil weer op.
031 Hom is t as gerechteghaid aanrekend,
van older op older, veur aaltied.
032 Ze werden grammiedeg bie t Meribawotter,
om heur mos Mozes der onder lieden,
033 ze hebben hom zo verbitterd,
dat hai gooide der mor wat oet.
034 Ze reuden aander volken nait oet
dij de HEER heur aanwezen haar,
035 ze werden aigen mit dij volken,
ze leerden wat dij deden,
036 ze vereerden dou heur ofgoden
en dij werden heur tou vaalstrik.
037 Ze brochten heur aigen zeuns en dochters
as ovvers aan demonen,
038 onschuldeg bloud hebben ze vergoten,
t bloud van heur zeuns en dochters,
dij ze ovverd haren aan ofgoden van Kanaän,
zodat t laand deur bloudschuld onthaailegd wer.
039 Ze werden onraain deur wat ze deden,
en wazzen ontraauw deur heur doaden.
040 Dou braandde grammiedeghaid van de HEER lös,
hai waalgde van zien volk, zien aarfdail.
041 Hai gaf heur over in macht van volken,
heur hoaters heersten over heur,
042 heur vijanden hebben heur verdrokt,
ze mozzen boegen onder dij heur macht.
043 Mennegmoal het hai heur red,
ze wazzen mit opzet opsternoat,
ze gingen onder in heur schuld.
044 Mor as hai heur nood zag,
as hai heur kloagen heurde,
045 den docht hai om heur aan zien verbond,
begrootte hom t vanwege zien grode traauwe laifde,
046 hai luit heur weer meedlieden ondervinden
van lu dij heur in gevangenschop brocht haren.
047 HEER, God van ons, red ons,
breng ons bie nkander oet volken,
om joen haailege noam te priezen
om te snaren van joen lof.
048 Te priezen is de HEER, de God van Israël,
veur aiweg en aaid.
Loat t haile volk “Amen” zeggen.
Pries de HEER!
