Genesis 23

⁰¹Sara is honderdzeuventwinneg joar worden, zo laank het Sara leefd.
⁰²Zai is sturven in Kirjat-Arba, dat is Hebron, in t laand Kanaän. Abraham ging hèn te kloagen om Sara en hai schraifde om heur.
⁰³Dou verluit Abraham zien dode en zee tegen de Hethieten:
⁰⁴“Ik bin n vremde, ain dij bie joe touholdt. Geef mie n aigen grafstee bie joe, den kin ik mien dode oetdroagen en begroaven.”
⁰⁵Hethieten zeden tegen hom:
⁰⁶“Heur ons aan, heer. Ie binnen bie ons as n vertegenwoordeger van God. Begroaf joen dode in t beste graf dat wie hebben. Gainain van ons zel joe zien grafstee waaigern om joen dode te begroaven.”
⁰⁷Abraham ging stoan, boog daip veur t volk van t laand, de Hethieten,
⁰⁸en zee tegen heur: “As ie t goud vinden dat ik mien dode oetdroag en begroaf, luster den noar mie en dou n goud woord veur mie bie Efron, de zeun van Sochar. Vroag hom dat hai mie grot van Machpela dut. Dij is van hom en ligt op t èn van zien laand.
⁰⁹Loat hom mie dij doun veur volle pries van n aigen grafstee bie joe.”
¹⁰ Efron zat maank Hethieten en hai zee tegen Abraham, dat ale Hethieten dij in poort van de stad wazzen t heuren konden:
¹¹ “Welnee man! Luster noar mie: ik geef joe t laand en grot ter bie. Mien volk is getuge dat ik joe t geef. Begroaf joen dode!”
¹² Abraham boog daip veur t volk van t laand
¹³ en zee tegen Efron, doar t volk bie ston: “Wees zo goud en luster noar mie. Ik betoal veur t laand t volle pond. Neem t van mie aan. Den kin ik mien dode doar begroaven.”
¹⁴ Mor Efron zee tegen Abraham:
¹⁵ “Heer, heur noar mie: laand van vaaierhonderd sjekel zulver, wat moakt dat oet, veur joe en mie. Begroaf joen dode toch!”
¹⁶ Abraham heurde Efron aan en woog hom t zulver òf dat hai nuimd haar doar Hethieten bie wazzen: vaaierhonderd sjekel zulver, gangboar in de handel.
¹⁷ Zo wer Abraham aigender van dat stok laand van Efron in Machpela, oostelk van Mamre, mit grot en ale bomen der omtou.
¹⁸ Ale Hethieten, lu dij noar stadspoort kommen wazzen, wazzen getugen.
¹⁹ Dou begruif Abraham zien vraauw Sara in grot op akker in Machpela, oostelk van Mamre, dat is Hebron, in t laand Kanaän.
²⁰ Zo is t goan dat Hethieten t laand mit grot, dij grafstee worden is van Abraham, aan hom overdoan hebben.